ბექა, a.k.a მჩხაპნელი ბლოგიდან Doin.ge

ჩემში ეჭვს იწვევს – ღირს თუ არა ტირილი იმის გამო, რაც სულერთია ახლა აღარ იქნებოდა. ნეტა ვინ მოიგონა? – რომ არ მომკვდარიყო, ან, არ მოეკლათ, ლეიტენანტი კი არა, ახლა გენერალი იქნებოდაო. არადა, რომ არ მოეკლათ, იქნებ ის ლეიტენანტობაც ჩამოერთმიათ. ვინ იცის? – ნოდარ დუმბაძე

რამდენიმე “რომ არ” ამ შემთხვევაშიც დაგროვდა…
“დემეტრე ვარდოშვილს “მტრის ენაზე რომ არ ელაპარაკა”, ალბათ, გაანახევარფინალებდნენ. ზოგიერთებს კი მაიასეული “ისტერიული ისტორიები” რომ არ მოეყოლათ – პირიქითო” – მავანნი ამბობდნენ.

სტრიპტიზის მოცეკვავის წინააღმდეგ ჩამცხრალი უკმაყოფილების ტალღა,  ჟიურის გადაწყვეტილების შედეგად, უკვე ცუნამად გადაიქცა და ჩვენს სისპეტაკეს წალეკვითაც დაემუქრა. თუმცა, ისიც თქვეს, რომ არ გადაეყვანათ, საზოგადოების გარკვეული ნაწილი (ანუ, ისინი ვინც, მისი გამოსვლით გამოწვეულ სიხარულს ხმამაღლა არ გამოხატავდა) ინტერესს დაკარგავდაო.

სხვა მხრივ, მოულოდნელი არაფერი ყოფილა. ”არაფერზე” წერა კი, როგორც აღმოვაჩინე, საკმაოდ რთული გამოდგა.
ამის გამო, სულ მოდულირებულ პოსტს რომ ვქმნიდე, მაინც ვერ ვიტყვი, რომ  ”ნიჭიერის” შემაჯამებელი გადაცემა, როგორც წესი,  წინამორბედებზე ბევრად უკეთესი აღმოჩნდა – მეთქი. გადაცემის ნახევარი მთქნარების გამო გამოვტოვე, მეორე ნახევრის მანძილზე კი, ერთადერთი საინტერესო ის იყო, რომ “საინტერესო არაფერი ხდებოდა”. შეფასებებიც, რომლებზეც გადაცემის დინამიურობა იყო დამოკიდებული, “ვაიმე, საყვარლები”-ს, “ნამდვილად კარგია”-სა და “არ მომწონს”-ს დიდი მანძილით არ გაშორებია. თუმცა, შედარებით უკეთესი გამოდგა დასკვნითი წუთები, როდესაც მონაწილეებს “საიდუმლო სერობისას” მიღებული გადაწყვეტილებები გაუმხილეს.

გადაცემის მიმდინარეობისას კი რატომღაც მხოლოდ ის ნომრები აჩვენეს თავიდან ბოლომდე,  ამ ორს შუა – უკვე თითქმის ყელთან რომ არის გაჩერებული. ვიდეოები – რომელიც ყველას ნანახი აქვს, ყველამ დეტალურად იცის და რომლებზეც ყველა აღნიშნავს, რომ “მარიამ კახელიშვილს საოცარი ხმა აქვს” და “გულნაზ გოლეთიანი პირდაპირ დამბურძგლავია”. მოკლედ, აბსტრაქტული “ყველამ ყველაფერი იცის” – სწორედ ამ შემთხვევაზეა ნათქვამი.

იმ დროს კი, როდესაც ჩვენ ამ ნომრებს უკვე მებევრამდენიღაცაჯერ ვუყურებთ, სრულიად არაფერი იყო ნაჩვენები კონკურსანტებზე, რომლებიც ნახევარფინალში გადავიდნენ ისე, რომ მათი გამოსვლა არავის უნახავს. მართალია, ეს ვიდეოები უკვე ყველასათვის კურსორმისაწვდომია, მაგრამ თვითონ გადაცემა უფრო საინტერესო იქნებოდა, ახლების ნაცვლად იგივე ნომრები რომ არ ყოფილიყო.

ამასთანავე, კაცის ბჭობაზე ღმერთის დამოკიდებულება შემაჯამებელ გადაცემაში კიდევ ერთხელ გამოჩნდა.

მანამდე: ხალხი იცინოდა ირაკლი ძამუკაშვილზე, მისი სიმღერის ტექსტზე, იკეთებდა შავ სათვალეს და იცვამდა თეთრ შარვალს, ნიკას ტაშს უკრავდა, მაიასა და გეგას გემოვნებას კი ვაგზლის ბაზარში აჟღერებული მუსიკის ჭრილში განიხილავდა. მოკლედ, როგორც ქართველ ერს სჩვევია ხოლმე, ქმნიდა პერსონაჟს, რათა შემდეგ მისთვის დაეცინა და ფიქრობდა, რომ ნახევარფინალებში გადასასვლელად ”უიღბლო შეყვარებულს” ოქროს თევზის დაჭერაც კი ვერ დაეხმარებოდა.

შემდეგ: ალბათ, უკვე ირაკლი ძამუკაშვილმა გაიცინა ხალხზე… და დაიქადნა, რომ მისი სიმღერით ნიკაც კი გაოცებული დარჩება. თუმცა, მისი გაოცება, რომ რთული საქმე არ არის, ეს უკვე ყველასათვის ადვილი შესამჩნევია.

საერთოდ, ჟიურის სამივე წევრი გაოცებას განსხვავებულად გამოხატავს: მაია – ტუჩების საშუალებით “WOW”-ს ხაზავს, გეგა მხოლოდ წარბის ოდნავი აწევა-შეთამაშებით კმაყოფილდება, ნიკა კი კბილებს ერთმანეთს გარკვეული მანძილით აშორებს.  ამის გამო, სასურველი იქნება, რომ ირაკლი ძამუკაშვილის მიერ ”მუქარის შესრულების” პროცესში, ნიკას გარშემო, რაც შეიძლება ნაკლები მწერი დაფრინავდეს. რა იცით, რა ხდება…

ისე კი “ღიმილი მაჩუქე კარგო”-ს გასაოცარი შესრულება ნამდვილად ძნელი წარმოსადგენია (გამომსვლელიც ფრენას თუ არ დაიწყებს, ან, სათვალის გაკეთებისას მართლა არ გაქრება). სამაგიეროდ, ფართო არჩევანი აქვს კორნელი მაისაშვილს, რომელმაც უკვე ისეთი “იმიჯი” შეიქმნა, რომ მის გატეხვას, ისევ თავის გატეხვა უნდა ერჩივნოს. ამის გამო, სავარაუდოდ, მისი თავიც განწირულია თავგანწირულობისათვის.

ნინო ჯავახიშვილის გამოსვლის ფორმატიც მეტად საინტერესოა. ოპტიმალური ვარიანტი, ალბათ, ერთი არხის მაფიოზური გადაცემის ხერხი და იდუმალი ხმით ნათქვამი სიტყვებია -  “პატივცემულო მაყურებლებო, ოჯახში სიმშვიდის შენარჩუნების მიზნით, გთხოვთ თქვენს შვილებსა და ქმრებს თვალები დაახუჭინოთ…”

“მე არ ვფიქრობ მომავალზე, ის ისედაც მალე მოდის” – ამბობდა აინშტაინი, ამიტომ უფრო საფუძვლიანი და სიტყვაუხვი საუბარი ნახევარფინალებამდე გადავდოთ

პ.ს: ისე, ძველბლოგერული ანდაზაა “პოსტი გადაცემასთან რომ დააბა, ან სტილს იცვლის, ან, ზომასო” და მგონი, ამ შემთხვევაში ხალხურმა სიბრძნემ ჭეშმარიტება იზეიმა…

საბა, ბლოგერი ni2.ge-დან

22 თებერვლის გადაცემის ყველაზე გამორჩეული მონაწილე ანა ხანჩალიანი იყო. ამაში, ალბათ, ყველა დამეთანხმებით. არ გადავაჭარბებ და არც მოვიტყუები თუ ვიტყვი, რომ ისეთი შთაბეჭდილება, როგორიც ამ გოგონას გამოსვლამ დამიტოვა არ დაუტოვებია არცერთ სხვა მონაწილეს.  მის გამოსვლას დღეში რამდენჯერმე ვუსმენ  და ყოველთვის ჟრუანტელი მივლის, საოცარი დიაპაზონის ხმა აქვს.

ანას გამოსვლა შეიძლება ერთი სიტყვით აღინიშნოს – სულშიჩამწვდომი. ჩვენს ქვეყანაში რომ შოუბიზნესი  და ნორმალური პროდიუსერები არსებობდნენ, ამ გოგონას იმავე საღამოს თუ არა გადაცემის გასვლიდან მეორე დღესვე გაუფორმებდნენ კონტრაქტს და მისგან ნამდვილ ვარსკვლავს შექმნიდნენ. თუმცა, დარწმუნებული ვარ,  ანას ისედაც ძალიან დიდი და ნათელი მომავალი აქვს და სულ მალე მას მსოფლიოც გაიცნობს.

”ნიჭიერის” ძალიან ბევრი ადამიანი უყურებდა სკეპტიკურად, მაგრამ მისი გამოსვლის შემდეგ, ალბათ, ცხადია,  რომ ამ პროექტმა მართლაც გაამართლა. თამამად შემიძლია ვთქვა, რომ ანამ ჩემი მეორე ფავორიტი მარიამ კახელიშვილი დაჩრდილა.  თუმცა, ძალიან არ მინდა,  ამ ბავშვების გულშემატკივრებს შორის რაღაც უაზრო კამათი დაიწყოს და ისეთივე საქმის გარჩევები წავიდეს, როგორიც სხვა მონაწილეების შემთხვევაში ხდება. ორივე გოგონას საოცარი მონაცემები აქვს და ორივე კაშკაშა ვარსკვლავი იქნება მომავალში. თქვენთან ერთად მოუთმენლად ველი ნახვარფინალებს, რომელშიც ამ ორი მონაწილის მოსმენა და მათი სიმღერით სიამოვნების მიღება გველოდება.

”ნიჭიერის” ეთერში გამოჩენიდან უკვე სამი კვირა მიიწურა და ჩვენი მესამე,
სტატისტიკის შემაჯამებელი პოსტის დროც დადგა.

ამ კვირის სტატისტიკის მიმოხილვას ამაყად ვიწყებთ. დაფიქსირდა პირველი მილიონი ”ნიჭიერის” სტატისტიკაში – myvideo-ს ”ნიჭიერის” არხზე განთავსებული ვიდეოები 1 057 000-ჯერ იხილეს! ეს ერთი და სხვა მრავალი. :)

Myvideo-ს მუსიკის განყოფილების ყველა დროის პოპულარული ვიდეოების ათეულში ”ნიჭიერის” 4 ვიდეო მოხვდა – გულნაზი გოლეთიანი პირველ ადგილს იკავებს, მარიამ კახელიშვილი – მესამეს, New style – მეხუთეს და სოფოსა და ლევანის დუეტი კი – მეათეს.

Myvideo-ს კვირის რჩეულებში კი დათო რობაქიძის ნომერი მოხვდა, რომელიც 41 800-ჯერ იხილეს.

ჩვენი ბლოგი 230 900-მა უნიკალურმა სტუმარმა მოინახულა, დაიწერა 7 280 კომენტარი. ძირითადად აქტიურებენ new style-სა და next level-ის მხარდაჭერები, ასევე ერთმანეთს ებრძვიან აკა&გვანცას და სოფო&ლევანის გულშემატკივრები. ნატა მესხი კი სოლოში იბრძვის.

ფეისბუქზე 6 641 მხარდამჭერი გვყავს, რომლებიც აქტიურობენ, გვიზიარებენ საკუთარ მოსაზრებებს და საინტერესო ლინკებს, რისთვისაც ძალიან დიდი მადლობა მათ. თუ ჯერ არ ხართ ჩვენი გვერდის წევრი – აუცილებლად გაწევრიანდით.

”ნიჭიერის” მეოთხე ეპიზოდამდე ერთი დღე რჩება. ძალიან მალე, ახალი გმირები მხოლოდ რუსთავი2-ზე, ორშაბათს, საღამოს 10 საათზე და მოგვიანებით უკვე – ჩვენს ბლოგზე – www.nichieri.ge.

”ნიჭიერის” ეთერში გამოჩენიდან უკვე ორი კვირა მიიწურა და ჩვენი მეორე,
სტატისტიკის შემაჯამებელი პოსტის დროც დადგა.
წინა კვირის შემაჯამებელი პოსტის ხილვა შეგიძლიათ ამ ბმულზე.

ამ დროისთვის ბლოგზე დაფიქსირდა 164 800 უნიკალური მომხმარებელი, ხოლო კომენტარების რიცხვმა 4 200-ს გადააჭარბა.

მაივიდეოზე ნიჭიერის გვერდი კვლავ რეკორდებს ხსნის. მაივიდეოსა და ნიჭიერის პარტნიორობა ორივესთვის ხელსაყრელი გამოდგა – ნიჭიერის გვერდზე განთავსებული ვიდეოების ჯამურმა ხილვებმა 644 200-ს მიაღწია, თავად მაივიდეოზე კი უნიკალური მომხმარებლების რიცხვი ბოლო პერიოდში 25%-ით გაიზარდა.

გულნაზი გოლეთიანის მეორე ადგილს წამოეწია მარიამ კახელიშვილის ვიდეო, რომელიც მესამე ადგილს იკავებს. პირველ რიგებშია ასევე new style და სოფო პეტრიაშვილისა და ლევან გელაშვილის დუეტი. გულნაზი გოლეთიანის ვიდეო სულ 101 000-ჯერ იხილეს, ხოლო მარიამ კახელიშვილის 84 800-ჯერ.

გეგა ფალავანდიშვილისადმი სიყვარულის ამხსნელთა რიცხვი კვლავ იმატებს, თუ წინა კვირაში 13-მა გოგონამ გამოხატა მისდამი ინტერესი, დღეისთვის უკვე ფეისბუქზე გვერდიც გაიხსნა და მასში 55 მდედრი გამოხატავს გეგასადმი სიყვარულს.

მაია ასათიანით დაინტერესდა 1 (ერთი) ადამიანი, ხოლო ვინმე ჟანამ ორი ადამიანის გულის მოგება შეძლო.

ფეისბუქზე უკვე 6 086 მხარდამჭერი გვყავს, რომლებიც აქტიურობენ, გვიზიარებენ საკუთარ მოსაზრებებს და საინტერესო ლინკებს, რისთვისაც ძალიან დიდი მადლობა მათ.

”ნიჭიერის” მესამე ეპიზოდამდე სულ ცოტა დრო – 22 საათი რჩება. ძალიან მალე, ახალი გმირები და ახალი კურიოზები მხოლოდ რუსთავი2-ზე, ორშაბათს, საღამოს 10 საათზე და მოგვიანებით უკვე – ჩვენს ბლოგზე – www.nichieri.ge.

ჩვენი მკითხველების თხოვნის საპასუხოდ გთავაზობთ მარიამ კახელიშვილის სიმღერას mp3 ფორმატში.

სიმღერის მოსასმენად დაწკაპეთ აქ: Play

სიმღერის გადმოსაწერად დაწკაპეთ აქ: Download

ბლოგერი ბექა, a.k.a მჩხაპნელი ბლოგიდან doin.ge

“თუ გსურს მიხვდე, რას გრძნობს დაბოღმილი ადამიანი, შექმენი წარმატებული ფილმი და მოგვიანებით, მისი მეორე ნაწილი გადაიღე” – “ჰოლივუდური” ანდაზა

საბედნიეროდ, საქართველო “ჰოლივუდი” არ არის.

“ნიჭიერის” მეორე ნაწილი პირველს სულ მინიმუმ იმიტომ მაინც სჯობდა, რომ წამყვანები ამჯერად “სკარლეტ ო’ჰარა და რეტ ბატლერი” აღარ ყოფილან და გადაცემის დასაწყისი გაცილებით  უკეთეს და უქარო ადგილზე ჩაწერეს, ვიდრე მოსიარულე ავტობუსის ღია სახურავია.

ნომრები კი იყო უფრო მრავალფეროვანი, უფრო სახალისო, უფრო ამაღელვებელი და “უf, “რო” მიგიზიდავს”, მოკლედ ისეთი.

გაგრძელდა თევზთა წარმოჩენა ფართო აუდიტორიის წინაშე. თუმცა, ახალმა კონკურსანტმა, კოკოლისგან განსხვავებით, ჟიურის წევრების სიმპათია ვერ დაიმსახურა და  მათ, მადლობის ნაცვლად, სახლში, სავარაუდოდ ქოქოლაც კი დააყარა. თევზების პროპაგანდა შოუში ასე თუ გაგრძელდა, ერთ დღეს სცენაზე არიელი რომ გამოვიდეს და “under the sea” ან რამე ასეთი იმღეროს, უკვე აღარც ეგ გამიკვირდება.

სამაგიეროდ, ის მიკვირს, რომ ამ გადაცემის შემდეგ არ გამოჩნდა თომა-თა არმია, რომლებიც აღმოაჩენდნენ, რომ “ნიჭიერის” ბრიტანულ ვერსიაში საიმონმა ზუსტად იმ სამი თითით მოიფხანა თავი, რომლითაც გეგამ და “გიტარისტები, ვითომ იქ რომ შეხვდნენ ერთმანეთს, სინამდვილეში წინა დღეს რომელიღაც კლუბში ერთად გამოდიოდნენ”.

ისიც გაუგებარია, ამრეზით რატომ არ განაცხადეს, რომ “კიდევ კარგი პატარა მარიამსაც ისევე არ დააძრეს კბილები, როგორც მის ბრიტანელ ანალოგს“.

ან, თუნდაც,  იმის მტკიცება არ დაიწყეს, რომ “KBIL-MAN”-ის ნომრის ბოლო სცენაც დადგმული იყო, რომ გეგას შეკითხვას “რა არის ამაში განსაკუთრებულიო” მხოლოდ ფორმალობის სახე ჰქონდა, რომ ჟიურის წევრები, უბრალოდ სამარშუტო ტაქსის კარის გაღების საბაბს ეძებდნენ, რომ ეს გოგო “ვა-ბანკში” მონაწილეობს…

…რომ ჟიურიმ სავარაუდოდ იცოდა მანქანაში მყოფი ადამიანების შესახებ, რომ… რომ… რომ… ერთი სიტყვით, გამიკვირდა, რომ არ შედგა ამდენი “რომ”-ის ამბოხება და…

რომ-ის იმპერია, ანუ, “პური და სანახაობა”

პირველი საუკუნის შემდეგ, ბევრი რამ შეიცვალა.

მაგალითად, რომისკენ მიმავალმა გზებმა სხვა მიმართულებითაც გადაუხვიეს და დრომ კი კოლიზეუმი ჩაკბიჩა.

თუმცა, რაღაც მაინც დარჩა უცვლელი: ოცდამეერთე საუკუნის ადამიანებს ისევე უყვართ “პური და სანახაობა”, როგორც ის ძველ რომში უყვარდათ. ხალხის დასაპურებლად და მათი თვალების წყურვილის მოსაკლავად კი “ნიჭიერის” ეს სერია ნამდვილად გამორჩეული გამოდგა…

“პური…

ადამიანის ორგანოებს, კერძოდ კი მათ კუჭებს წყევლა რომ შეეძლოს, ჟიურის წევრებს მინიმუმ ენა უნდა ჰქონდეთ გამხმარი. ის ენა, რომლითაც ხინკლისმჭამელი მონაწილე დამძიმებული მუცლითა და კიდევ უფრო დამძიმებული ხასიათით სცენიდან გაისტუმრეს. მართალია,კონკურსანტის სხეულში მდებარე “აღუვსებელი საწყაულის” “კუჭობა” ერთი მხრივ ეჭვქვეშ დასაყენებელია, მაგრამ, თუკი ჟიურიმ წინასწარ იცოდა, რომ ნომრის შემდეგ ამ კაცს თავის დამშვიდება მხოლოდდამხოლოდ უფასო სადილით შეეძლებოდა, მისი ქეიფი დროზე ადრე უნდა გაეწყვიტა. წამზომზე დანიშნული დროის უკანასკნელი წამების ფაცი-ფუცი, დაძაბულობა და მოულოდნელად ჟიურის კომენტარი: “იცით, მე ამას მხარს ვერ დავუჭერ” - ცოტა ცუდად გამოჩნდა. მთელი ნომრის მანძილზე ადამიანი თუ ხინკალს ჭამდა, ბოლოში წამწამზე ვერ იჩქმეტდა, რომ ამის გულისთვის დაცდა ღირებულიყო.

ადამიანის ორგანოებს, კერძოდ კი მათ კუჭებს (არანაირი დეჟავუ)… ლაპარაკი რომ შეეძლოთ, მაია ასათიანის ენას სერიოზული კონკურენტი გამოუჩნდებოდა. როგორც გადაცემიდან ჩანს, ჟიურის წევრებსა და წამყვანებს “სმა-ჭამა დიდად შესარგი” ნამდვილად არ აკლიათ, მაგრამ რამდენიც სცენაზე ისეთი რამ გამოჩნდა რაც იკბიჩებოდა, მაია ასათიანმა ყველაფრის (ცოტას ვაჭარბებ: ხინკალი და თონის პური იყო მარტო) ჭამის სურვილი გამოთქვა. კიდევ კარგი, ჟიურის სხვა წევრებმა პატარა მარიამზე სიყვარულით “ჩასაყლაპი ბავშვიაო” არ თქვეს, თორემ ვინ იცის…

…და სანახაობა”

“ნიჭიერის” მეორე სერიაშიც აღმოჩნდა ბევრი ისეთი, ვის “ტრაქტორსაც” “ტრა(ე)ქტორი(ა)” აერია და გამონაბოლქვი ჰაერით ჟიურის წევრების “ტრაქეები” “დაწამლა”. თუმცა, რა თქმა უნდა, იყო ისეთი ნომრებიც, რომელთა გამო მინიმუმ გადაცემის ყურება ღირდა, შექმნა თუ არა. იმის აღწერას ნამდვილად არ დავიწყებ, ვინ რა გააკეთა და ვინ რის გაკეთებას ცდილობდა. ჩემამდე ეს უკვე არაერთხელ დაიწერა და “იყურა”, რის გამოც მე მხოლოდ მცირე შეფასებებით შემოვიფარგლები:

• ბერნარდ შოუ ამბობდა, რომ “ცეკვა ეს არის ჰორიზონტალური სურვილების ვერტიკალური განხორციელება, რომელიც ლეგალიზებულია მუსიკით.” თუმცა, ასეთი განმარტების ავტორიც კი ვერ შეძლებდა სახელი დაერქმია იმისათვის, რაც სცენაზე ზედიზედ ორმა გოგომ გააკეთა. გაცილებით უფრო მისაღები იქნებოდა, თუკი ანკეტაში ჩაიწერებოდა შემდეგი ნიჭი: “ვაპირებ, ამოვვარდე მენჯიდან”, ან, რაიმე მსგავსი…
• მარკ ტვენი ამბობდა, რომ “სჯობს იყო ჩუმად და გამოჩნდე სულელი, ვიდრე ხმა ამოიღო და ამაში ყველა დარწმუნდეს.” ხოლო, თუ ჩვენ ერთ შეურაცხმყოფელ სიტყვას “ცუდი მომღერლით” შევცვლით, მაშინ ეს წესი “ნიჭიერის” ბევრ მონაწილეს გამოადგება. სწორედ მისი არად ჩაგდებისთვის მოშანთეს ულმობელად ჟიურის წევრებმა “ო შანტე”-ს შემსრულებელი მოხუცი, მხარზეჯოხგადებული კოლმეურნე ქალები და ბევრი სხვა, რომელთა გაქრობის მისიაც საკუთარ თავზე სავარაუდოდ მემონტაჟეებმა აიღეს.
• ჩემი მეზობელი იურა ერთ-ერთ ქელეხზე ამბობდა, რომ “ცხონებული გოდერძი იქამდე იცოცხლებს, სანამ ის ჩვენს გულებში იქნება”. ხოლო, “მოზაიკის” მიერ შესრულებულმა ნომერმა ცხადყო, “რომ ცუდად მაინც არ ჩაუვლია იმ განწირულის სულისკვეთებას, და გზა უვალი, მისგან თელილი, მის მიმდევრებში მაინც დარჩება.” ჯექსონის შესანიშნავმა იმიტაციამ დატოვა ერთადერთი შეკითხვა: “თუ რატომ ეგდო საბრალო ქუდი მთელი ცეკვის მანძილზე სცენაზე ეულად და სევდისმომგვრელად”

• • ოპტიმისტური ანდაზა ამბობდა: “თუ გარშემო ყველა ტირის, ეს სულაც არ ნიშნავს იმას, რომ შილა-ფლავის მომზადება უნდა დავიწყოთ”. ხოლო, პატარა მარიამმა ამ ანდაზის ჭეშმარიტებას გამარჯვება კიდევ ერთხელ აზეიმა. იტირა ბებიამ, იტირა მამამ, იტირა თიკამ, “ამან და ამან”-აც იტირა და დარწმუნებული ვარ, “ესა და ეს”-იც იტირებდა… რადგან სიხარულიც შეიძლება რომ მწუხარების ინგრედიენტებით გამოიხატოს.
  • ერთი მომიტინგე ამბობდა, რომ “ამ ქვეყანაში ყველაფერი ჩაწყობით ხდება“, ამის გამო მე აღარ მიკვირს ის, თუ რატომ ვერ მიაღწია წარმატებას ვერც ერთ კონკურსში მარიამ კახელიშვილმა. რადგან,  ზოგან და ზოგჯერ ჟიური მართლა ისეთ გადაწყვეტილებას იღებს, რომ სურვილი გიჩნდება მის წევრებს მაიკლ ტაისონი მიუქსიო და სმენაზე მეტი პრობლემები შეუქმნა…

დასკვნის მაგიერი: “ეკონომილირიკული წიაღსვლა”

ეკონომიკაში “მოთხოვნა-მიწოდება” ერთ-ერთი ძირეული საკითხია, რომლის მიხედვითაც თუ მოთხოვნა მიწოდებას გადააჭარბებს, ამა თუ იმ “პროდუქტზე” დეფიციტი შეიქმნება.

“ნიჭიერის” სულ ორი გადაცემა გახდა საკმარისი იმის დასადგენად, რომ ქვეყანაში გეგას დეფიციტია და თუ ასე გაგრძელდა, სიტუაცია კრიზისამდე მივა… საჭიროა შავი ნიღაბი სახეზე, შინდისფრად შეღებილი თმები, ან, საქვეყნო აფიშირება იმისა, რომ გეგას ცოლი ჰყავს…

პ.ს: კულუარული ინფორმაციით, თურმე მესამე გადაცემა ისეთი იქნება, რომ წინა ორს შეიძლება საერთოდ არსებობის შერცხვეს. ეს ისე…

თინი, ბლოგერი tiny.ge-დან

რამდენმა თქვენგანმა იფიქრა, რომ მეორე გადაცემა პირველზე უკეთესი იყო? დარწმუნებული ვარ, ძალიან ბევრმა. იმდენი საინტერესო რამ ხდებოდა, გადაცემის დროსვე დავიბენი – ყველა მონაწილეზე მინდოდა ცოტ-ცოტა რაღაცის თქმა.

ე.წ. “თევზი”  ”ნიჭიერი”-ს პირველი გადაცემის გასვლამდე გახდა პოპულარული და არავისთვის არ ყოფილა მოულოდნელი მისი შეუდარებელი გამოსვლის ხილვა. უბრალოდ, იმ ვიდეოში იმაზე წყდებოდა კადრი, გეგამ რომ მაიას და ნიკას ღილაკებს დააჭირა და გაგრძელება ჩვენ არ ვიცოდით. სიმართლე გითხრათ, გავოგნდი, როცა ნიკა მემანიშვილმა მარიამ რაფავას მეორე ტურში გადასაყვანად თავისი “კი” არ დაიშურა. ძალიან გამიკვირდა. კიდევ კარგი, მაიასაც გული არ აუჩუყდა და თავისი  ხმა ჭკვიანურად გამოიყენა, თორემ მე თუ არა, გეგა ნამდვილად არ აპატიებდა ამას! : )

ნებისმიერ ფრანგს შეშურდებოდა ლუარა ქირიას წარმოთქმული “ო შანტე”! “ფრანგულად იმღერებთ ფანდურზე?”- ლოგიკური კითხვა დაებადა მაიას. ლუარამ კი  აბსოლიტურად აუღელვებლად, ცოტა გაკვირვებითაც კი უპასუხა სათანადოდ და შეუდგა სიმღერას:

“ო შანტე, ო შანტე

ბრა(ვ)ო.. ბრა(ვ)ო ბრა(ვ)ო

გული ნუ დამიშანთე

პარიზელო ქალო! “

შემდეგ იყვნენ მუცლურ-შაკირულ-ჯენიფერლოპესური ცეკვების უბადლო შემსრულებელი, უემოციო კარატისტები, გვერდზე-გვერდზე ტექნიკით მოცეკვავე გოგონა, რომელსაც, როგორც ჩანს, მხოლოდ ეს მოძრაობა ჰქონდა გათავისებული, ლომი გაკადნიერებული ირმითურთ, რომელმაც ცხოველთა მეფე პანღურით გაიყვანა სცენიდან!

რაჭველების და ნიკას “შეხვედრის” ემოციები ყველას ახსოვს ალბათ. სცენაზე რომ გამოვიდნენ, გოგოების ჩაცმულობა – ჩითის კაბები მომეწონა. თავიდან  ლექსისებური  შესავლით რომ  დაიწყეს, ცოტა შევიშმუშნე უსიამოვნოდ, თუმცა სიმღერის დროს   მოვლბი. მეორე ტურში გადასაყვანად მე შეიძლება არ გამემეტებინა ჟიურიში რომ ვმჯდარიყავი, მაგრამ  ამ “შეიძლება”-ს იმიტომ ვამბობ, რომ გულ და თვალებანთებული ფეხზე წამომდგარი მემანიშვილის დანახვაზე შეიძლება გადმომდებოდა მისი ემოციები : )

“რას ვიზამთ მა? - ჩვენ გავიმარჯვებთ!”

უსაყვარლესი ბავშვი, რომლის თვალების და ღიმილის დანახვისთანავე, მამამისის არ იყოს, მეც გულში ვთქვი – რას ვიზამთ? გავიმარჯვებთ! :)  მარიამის მამა, ბებო და თიკა ფაცაცია ერთად ტიროდნენ…  გარდაცვლილი დედის და ამ თვალებბრიალა ბავშვის სურათი რომ გვანახეს,  გამცრა ტანში :(

შემდეგ იყო კახელი ილია არდაზიშვილი, რომლის ხელით აწყობილი ტრაქტორითაც მოვიხიბლე და, სხვა თუ არაფერი, როგორც თიკამ თქვა “ოპერაში ნამყოფი ტრაქტორი ჩადის კარდენახში”! არ გამომრჩება ხინკლებით მოსული თამაზ დაველურის და მშიერი მაია ასათიანის შეხვედრა. მანქანის გათრევა, რომლის ყურებისას ვიფიქრე – ასე ხომ მეც შევძლებდი-მეთქი! ფრიად პლასტიკური ადამიანი, რომლის დანახვისას გეგას ქართული კინო “ქვევრი” გაახსენდა. შემდეგ გულისწორების ფანდურით ხმის მოზიდვის ტექნიკა – “მოზიდული” კი ქერა თმაში და შავ ულვაშებში გამოწყობილი ქალბატონი აღმოჩნდა.

აბა რომელ ჰოლივუდელს შეშურდა ამ ფოტოს ხილვა? მისი  დანახვისას, მგონი ყველამ მივმართეთ მის კბილებს “ნეტავ რა კბილის პასტამ გაგხეხა”-ო. მანქანას  რომ დაეჭიდა, მაშინვე კბილები ამტკივდა! თუმცა ამას ვინ აქცევდა ყურადღებას, მერაბ კირაკოზაშვილის გამოსვლის ყველაზე საინტერესო და სასიამოვნო ნაწილი  მამაკაცებისთვის მაშინ დაიწყო, როცა  მანქანიდან გოგონები გადმოვიდნენ. ჟიურისთვის და წამყვანებისთვის კი მაშინ, როცა საბარგულიდან სცენაზე გაშლილმა მაგიდამ გადმოინაცვლა. აი ხინკლის ჭამის დროს ეჭვი შემეპარა და ამ შოთების და პრასის დანახვაზე ჟიურის რეაქცია რომ ვნახე, ეჭვი დავადასტურე – ყველას შიოდა! :D

ჩემი და ალბათ ყველას ფავორიტები:

მეგობრები, რომლებმაც შემთხვევით აღმოაჩინეს ერთმანეთი კასტინგზე და ექსპრომტად დაუკრეს გენიალურად!

ლაშა კვიკვინია & გუჯა მჭედლიშვილი

ე.წ. ილია ჯექსონი და  ჯგუფი “მოზაიკა”

მარიამ კახელიშვილი

რომელმაც შესავალ სიუჟეტში თქვა, რომ არც ერთ კონკურსში არ გაუმარჯვია! ვერ წარმომიდგენია,  ვერ ვიჯერებ, როგორ შეძლებოდა, რომ ამ გოგონას სადმე ვერ მოეპოვებინა გამარჯვება. სუნთქვა შეკრული ვუსმენდი მის სიმღერას. დარწმუნებული ვარ, ყველაში დიდი ემოცია გამოიწვია მისმა სიმღერამ :) ყველაზე ძალიან მაია ასათიანის რეაქციები დამამახსოვრდა- მთელი ის დრო, რაც მარიამი მღეროდა, გულზე ხელი ჰქონდა დადებული, გეგონება beyonce-ს listen-ის მაგივრად საქართველოს ჰიმნს უსმენდაო :))

როგორც გეგამ თქვა, დარწმუნებული ვარ, ეს ერთი სიმღერა მარიამის ცხოვრებას შეცვლის!

ასეთი იყო “ნიჭიერი”-ს მეორე გადაცემა. მესამე გადაცემაში კი გპირდებით, ნამდვილი ბომბი გელით : )) როგორც ამბობენ, ისინი ერთ-ერთი ფავორიტის, new style-ს კონკურენტებად მოგვევლინებიან..

მაშ ასე, ერთად დაველოდოთ შემდეგ გადაცემას თავისი მოულოდნელობებით, ახალი ფავორიტებით და ახალი გმირებით. მე კი მომავალ სამშაბათამდე გემშვიდობებით :)

მარიამ კახელიშვილი: