68 წლის შოთა მიქელაძე, ოდესღაც სცენაზე იდგა. შემდეგ კი მეურნეობას მიჰყო ხელი. 2 შვილის მამას და ხუთი შვილიშვილის ბაბუას, 30 წლიანი პაუზის შემდეგ, პირველად გაუჩნდა სურვილი, რომ ემღერა ჩვენს სცენაზე. შეასრულა სიმღერა “სადაურელი ხარ გოგოვ” აკაპელაში და დიდი შთაბეჭდილება მოახდინა დარბაზზე და ჟიურიზე. სამი “კი” – შოთა მიქელაძე შემდეგ ტურშია!

7 წლის პატარა მოცეკვავე, მარიამი, ჟიურის წინაშე  ქართული ცეკვით, “ჯეირანით” წარსდგა. მის ნომერს შთამბეჭდავი უწოდეს. “შენგან ძალიან კარგი მოცეკვავე დადგება” – ასე შეაფასა ის ვანომ. სამი ძალიან დიდი “კი” და მარიამი შემდეგ ტურშია!

ცეცხლოვანი ექიმების ანსამბლი “ვეგა” , ესპანური ცეკვის შესასრულებლად გამოვიდა სცენაზე. სინქრონი და მთლიანი ნამუშევარი დადებითად შეაფასეს და გადაწყვეტილება  მათ სასარგებლოდ მიიღეს. სამედიცინო უნივერსიტეტის სტუდენტები მეორე ტურში არიან!

21 წლის “Lady gaga”-ს ფანმა, გადაწყვიტა  ვიზუალური მონაცემებით და ჩაცმულობით დამსგავსებოდა პოპ ვარსკვლავს. თავდაჯერებულობის მიუხედავად, მაღალქუსლიანი ფეხსაცმლით სცენაზე გასვლა მან ბოლო მომენტში გადაიფიქრა…”ბატონი გაგას” შესრულებული სიმღერა, რომელიც ქალბატონი გაგას რეპერტუარიდან იყო შერჩეული, არ აღმოჩნდა საკმარისი “კი”-ს მისაღებად. სამი წითელი იქსი აინთო მის თავს ზემოთ და ჟიურიმ მისი მუსიკალური მონაცემები უარყოფითად შეაფასა.

ფოლკლორული ანსამბლი, “ქართველო”, რომელიც ტექნიკური უნივერსიტეტის ბაზაზე ფუნქციონირებს, ყველა კუთხის წარმომადგენლებს აერთიანებს.ნიჭის გამოსავლენად, მაყურებლის წინაშე გამოვიდნენ. “არაჩვეულებრივები ხართ ყველანი”, “შესანიშნავი გამოსვლა იყო”  - ასეთი ოვაციებით შეხვდა ჟიური ნომრის დასრულების შემდეგ ანსამბლს. “ქართველომ” სამი “კი” მიიღო!

მიშკა კახაშვილმა, მძიმე ფიზიკური ტრავმის მიუხედავად, სულიერი სიმტკიცე გამოიჩინა. 5 წლის იყო, როცა სახლში ბუნებრივი აირი აფეთქდა და მიიღო სხეულის 75% – იანი დამწვრობა. ზედმეტი დაზიანების გამო, მას თითებიც მოაჭრეს. ამის მიუხედავად, დაიწყო მუსიკის სწავლა, გიტარაზე დაკვრას დაეუფლა. გარდა ამისა, სპორტით და ხატვითაც არის დაკავებული. გადაწყვიტა, რომ ხალხისთვის “ნიჭიერის” საშუალებით ეჩვენებინა თავისი ნიჭი და სცენაზე საკუთარი კომპოზიციები შეასრულა. ნომერი კი საქართველოს ჰიმნით დაასრულა. “გეტყობათ, რომ საოცარი მუსიკალური შესაძლებლობები გაქვს. მიხარია, რომ პროფესიონალ გიტარისტად ჩამოყალიბდი” – ასე შეაფასა სოფომ მიშკა. ნიჭიერი გიტარისტი შემდეგ ტურშია!

თემურ კახელიშვილი ჩვენს ნაცნობ და საყვარელ სახესთან, მარიამ კახელიშვილთან მოვიდა კასტინგზე. ამჯერად, მარიამი თავის ძმას გულშემატკივრობდა. მაიკლ ჯექსონის “We are the world” შეასრულა. მიუხედავად რამდენიმე შენიშვნისა, რომელიც მღელვარებას მიაწერა ჟიურიმ, თემური შემდეგ ტურში გადავიდა.

რა არ უნახავს ამ პროექტს, მაგრამ ეს იყო პირველი შემთხვევა, როცა მონაწილე საკუთარი აღმოჩენით მოვიდა კასტინგზე! გულვარდ ნიკოლავამ, 45 წლიანი დაკვირვების შედეგად აღმოაჩინა, რომ “დედამიწა მოძრაობს, მიყვება კრუგში ასე და მთვარე და დედამიწა ერთდროულად ამთავრებენ ბრუნვას”. ილუსტრაციისთვის კი, ველოსიპედის ბორბალი გამოიყენა დედამიწის როლში. თავად მთვარის ამპლუაში მოგვევლინა და შეეცადა ეჩვენებინა ეს მოვლენა. მთვარე და დედამიწა ერთმანეთის გარშემო ბრუნავენ – ასეთია მისი თეორია. შემდეგ ტურში კიდევ ერთი აღმოჩენის გამხელას აპირებდა და წინასწარ გაგვიმხილა - ”ან მთვარეა შემობრუნებული , ან დედამიწაა გადაადგილებული”. ჟიურიმ, მას შესაბამის საკითხებში კომპეტენტურ პირებთან მისვლა ურჩია და სამი “არა”-თი გაისტუმრა სცენიდან.

არამ კარაპეტიანი სომხეთიდან ჩამოვიდა. როგორც ამბობს, ერევანში ძალიან პოპულარულია. ახლა კი, საქართველოს დაპყრობაც მოინდომა. “გაუმარჯოს საქართველო” – ამ შეძახილით გამოვიდა სცენაზე, თუმცა საუბარი ჟიურისთან ინგლისურად, დარბაზთან კი სომხურ ენაზეც გაიმართა. “ბლატნიე, ვარავსკიე პესნი”  - ასეთი რეპერტუარის მიუხედავად, 500 ლარიანი ჯარიმის არ შეეშინდა და მაინც შეასრულა სიმღერა. “ჩემი ხმა ზუსტად ემთხვევა ბუტირკის ხმას” – ეს დამთხვევა საკმაირის არ აღმოჩნდა მეორე ტურში გადასასვლელად…

კარატეს კლუბმა “ალიგატორმა”, კასტინგები გახსნა დღეს. ჯეიმს ბონდის თემატიკაზე შექმნილმა, სიურპრიზებიანმა, სახალისო და თან რთულმა ნომერმა, ჟიურიც მოხიბლა და მაყურებელიც. ვანომ მათ ნომერს შემდგარი შოუც უწოდა. “ალიგატორი” შემდეგ ტურშია, ჟიურის სამივე წევრის თანხმობით!

ორ საათზე ნაკლები დრო რჩება “ნიჭიერის” ახალ გადაცემამდე. იქამდე, ტრადიციულად, გთავაზობთ ერთ-ერთი მონაწილის ფოტოს. გამოიცანით რა ნიჭით მოვიდა ის ჟიურის და მაყურებლის წინაშე:

დღეს “ნიჭიერის” დღეა! ეს გადაცემა იმით იქნება გამორჩეული, რომ ყველაზე განსხვავებულ და უცნაურ ნომრებს ვნახავთ. მაგალითისთვის, მამრობითი სქესის GAGA-ს, კასტინგზე შორეული რეგიონიდან თხილამურებით ჩამოსულ ბიჭს, ეგზოტიკურ ცეკვას…შევეხებით ისეთ ღრმა მეცნიერულ-ფილოსოფიურ საკითხებს, როგორიცაა მთვარისა და მზის ბრუნვის ტრაექტორიები და ვნახავთ, რომ ტალანტს ტრავმები ვერ დააბრკოლებს…

გელოდებით საღამოს 10:00 საათზე, რუსთავი2-ზე!

ნიჭიერის მესამე სეზონში ერთი-ერთი ყველაზე განსხვავებული ნომერი, საჰაერო აკრობატის – ნატა შუაქრიშვილის გამოსვლა იყო. როგორც გახსოვთ, აკრობატმა უარი თქვა დაზღვევის გამოყენებაზე და ამან მისი ლამაზ ნომერს დაძაბულობა შემატა. მეეჭვება ვინმე გულგრილი დარჩენილიყო ამ წარმოდგენისადმი.

როგორც ნატა ყვება, ყველაფერი იმით დაიწყო, რომ 16 წლის ასაკში, ცირკში მივიდა. გაგიკვირდებათ, მაგრამ თავდაპირველად მისი განძრახვა ცხენებთან მუშაობა და მათთან ერთად ნომრებში მონაწილეობა იყო. ცირკშიც სწორედ იმიტომ აღმოჩნდა, რომ ეს ცხოველები ძალიან უყვარს. რამდენიმე ხანში მას ბაგირზე სიარულის სწავლა შესთავაზეს. ნატა დათანხმდა და რამდენიმე თვეში უკვე წარმოდგენებზე ამ ნომრით გამოდიოდა. სწორედ ამ დროიდან დაიწყო მისი, როგორ საჰაერო აკრობატის კარიერა.
მას შემდეგ, ნატა უკვე 20 წელია ამ სფეროში მოღვაწეობს. გამოსულია ძალიან ბევრ წარმოდგენაზე, შოუზე და შეჯიბრებაზე. არამხოლოდ საქართველოში, არამედ საზღვარგარეთაც.  მას შემდეგ, რაც თბილისის ცირკი დაიხურა,  რამდენიმე მოსწავლე ჰყავდა, ასევე ხელმძღვანელობდა სტუდიას. 2012 წლის დამდეგს კი, ახლადგახსნილი თბილისის ცირკის საახალწლო შოუში გამოვიდა. როგორც ნატა ამბობ, ცირკის გუმბათის  ქვეშ მუშაობა მისთვის  დიდი ადრენალინია და ეს ძალიან მოსწონს.

ალბათ გაგიკვირდებათ, მაგრამ პროფესიით ნატა ეკონომისტია. აკრობატიკა მისი ”ჰობია”.  სწორედ მისი სიყვარულის გამო გადაწყვიტა ნატამ ნიჭიერში გამოსვლა. ნახევარფინალისთვის, აკრობატი უცხო, ძნელ და ძალიან ლამაზ გამოსვლას ამზადებს, თუმცა ნომრის დეტალებს ჯერ არ გაგანდობთ. ნატას 11 წლის შვილი ჰყავს, რომელსაც ძალიან უნდა დედასთან ერთად ნიჭიერში გამოსვლა.

გადავა თუ არა ნატა შუაქრიშვილი ნახევარფინალში და როგორ ნომერს წარმოადგენს ის სცენაზე, სულ რამდენიმე კვირაში გავარკვევთ. მანამდე, ვუსურვოთ მას დიდი წარმატება და მოვლენების განვითარებას დაველოდოთ.

შოუს დაწყებიდან თითქმის ერთი თვე გავიდა. ამ პერიოდში, ბევრი საინტერესო და ნიჭიერი ადამიანის გამოსვლა ვიხილეთ. ნიჭიერის ბლოგმა გადაწყვიტა დაკავშირებოდა პირველ გადაცემაში გამოსულ პროგრამისტ-პიანისტს, გიორგი წერეთელს და მის შესახებ მეტი ინფორმაცია შეეტყო.
გიორგი 20 წლისაა. ფორტეპიანოზე დაკვრას მე-4 კლასიდან სწავლობს. როგორც ბავშვების უმეტესობას, თავიდან, გიორგისაც არ უყვარდა ”მუსიკაზე სიარული”. თუმცა, მერე ფორტეპიანოსადმი დამოკიდებულება შეიცვალა და მე-8 კლასიდან, საკუთარ მუსიკასაც წერს.

ინსტრუმენტზე დაკვრას, გიორგი ხელოვნების მე-2 სკოლაში სწავლობდა.  ამ დროის განმავლობაში, ის უამრავ კონკურსზე და კონცერტზე არის გამოსული. მათ შორის, სიმფონიურ ორკესტრთან ერთად, თბილის ოპერისა და ბალეტის თეატრში და კონსერვატორიაში.

ნიჭიერში გამოსვლა გიორგიმ იმიტომ გადაწყვიტა, რომ უნდა ხალხმა მის მიერ შესრულებულ მუსიკას მოუსმინოს.  როგორც ამბობს, ქასთინგზე გამოტანილი  მელოდია  - ჯელი როლ მორტონის “The Crave” (რომელიც ასევე გაჟღერებულია ფილმში ”The Legend of 1900”) ძალიან უყვარს და ამიტომ გადაწყვიტა სწორედ ის დაეკრა.

დღეისათვის, გიორგი სწავლობს თბილისის სახელმწიფო უნივერსიტეტში, ზუსტ და საბუნებისმეტყველო მეცნერებათა ფაკულტეტზე. მუშაობს პროგრამისტად და უკრავს ბენდში “Shelby”. მისი საყვარელი კომპოზიტორები  სერგეი რახმანინოვი და ფერენც ლისტი არიან. ნიჭიერის მისი ფავორიტი მონაწილეები არიან ჯგუფები ”ფანტომი” და ”აკროსტაილი” შოუს მეორე სეზონიდან.

ვუსურვებთ გიორგის წარმატებებს :)

რუბრიკაში “ნიჭიერი პრესაში”, გთავაზობთ ჟურნალ “სარკეში” გამოქვეყნებულ ინტერვიუს ჟიურის წევრთან, გეგასთან. სტატიის ავტორი ქეთი დინოშვილი:

[გასადიდებლად დააკლიკეთ სურათს]