“ნიჭიერს” მხოლოდ ერთი გამარჯვებული ეყოლება. ჟიურის არჩევანის გაკეთების უფლება არ აქვს – იმას, თუ ვინ გახდება ქვეყნის ყველაზე ნიჭიერი, ვინ მიიღებს ბინას დრიმთაუნში და დააგვირგვინებს “ნიჭიერის” პირველ სეზონს მხოლოდ თქვენ, მაყურებლები წყვეტთ.

არ დაგავიწყდეთ, მიეცით ხმა მას, ვინც, თქვენი აზრით, ღირსეულია იწოდებოდეს ყველაზე ნიჭიერად!

ვიღებთ ერთი შეხედვით მარტივ ფოკუსებს, ვამატებთ დიდ იუმორის გრძნობას, ცოტაოდენ ქარიზმას და ვიღებთ ნიჭიერის ფინალისტს, დავით რობაქიძეს. ათი წუთის მანძილზე სცენაზე მარტო მდგომი დათო ახერხებს, რომ არ დაკარგოს არც ერთი მაყურებელი, ყველა სუნთქვაშეკრული უყურებს, დარბაზს ხან სიცილის ტალღა გადაუვლის, ხან გაოგნებისგან პირი აქვს დაღებული ყველას. თვითნასწავლი ილუზიონისტის, დავით რობაქიძის ფინალური ნომერი ისეთივე უნიკალური და დასამახსოვრებელი იქნება, როგორიც მისი კასტინგისა და ნახევარფინალის ნომრები. დათოს შესახებ დამატებითი ინფორმაცია ამ პოსტში შეგიძლიათ იხილოთ, ახლა კი ის თქვენს შეკითხვებს პასუხობს:

- როგორი გოგოები მოგწონს?

- აქტიური, ჭკვიანი თუ იქნება – კარგია, მაგრამ აუცილებელი არ არის. ჩემი ტოლი უნდა იყოს ასაკით… არა, არა, ასაკს აზრი არ აქვს. მაღალი თუ იქნება, კარგია… არა, არა, სიმაღლესაც არ აქვს მნიშვნელობა. ქერა თუ შავგვრემანი? არც ამას აქვს მნიშვნელობა. ა, როგორ არა, შავგვრემანი, რომელიც ქერად იღებავს, ხო. არა, არა, ასე არ დაწერო!

- ასეთი კითხვა დასვეს – ათლარიანზე რამე რომ დავაწერო, დათო კივიდან ამოიღებს მერე იმას?

- კი, როცა გაგიხარდება.

- ვინმე მასწავლებელი გყავდა?

- არა, მიუხედავად იმისა, რომ ბევრ ილუზიონისტს ვიცნობ.

- ვინაა შენი საყვარელი ილუზიონისტი?

(აქ ოთახში მყოფი ავთო გოგეშვილი ხმამაღლა  ამბობს: “ავთო გოგეშვილი, ავთო გოგეშვილი!”)

- დევიდ ბლეინი.

- რა რეაქცია გქონდა, ჟიურიმ შენი სახელი და გვარი რომ გამოაცხადა და გაიგე, რომ ფინალში გადახვედი?

- ხელები დამიბუჟდა და ვერ ვინძრეოდი, ძალიან ბედნიერი ვიყავი.

- რამდენი ხანი ემზადებოდი ფინალური ნომრისთვის?

- 1 კვირაზე ნაკლებ დროში მოვამზადე ფინალის ნომერი.

- რას ეტყვი შენს გულშემატკივრებს?

- რაც მთავარია, ფინალში ღირსეულ კონკურსანტს უნდა უგულშემატკივრონ. ყველას უდიდესი მადლობა, ძალიან დიდი მხარდაჭერა იგრძნობა მათგან.

დათო კასტინგზე:

დათო ნახევარფინალში:

მარიამ კახელიშვილის ვიდეომ ყველა რეკორდი მოხსნა ვიდეოებს შორის – ის 195 000-ზე მეტჯერ იხილეს. პატარა გოგონამ, რომელსაც სხვა კონკურსებში არ უმართლებდა და ლამის ამის გამო სიმღერაც მიატოვა, მოახერხა და მთელი საქართველო აალაპარაკა. მის შესახებ პოსტის წაკითხვა ამ ლინკზე შეგიძლიათ. ამჯერად ის თქვენს გამოგზავნილ შეკითხვებს პასუხობს:

- ერთ-ერთ ვიდეოში ამბობ, რომ სიმღერისთვის თავის დანებებას აპირებდი. რამდენიმე კითხვა მოგვწერეს ამასთან დაკავშირებით, თუ ვერ გაიმარჯვებ ნიჭიერში, სიმღერას მაინც გააგრძელებ?

ოთახში ჩვენთან ერთად ბაბი და მარი და ანა ხანჩალიანი არიან. ამ კითხვაზე მარიამი თავჩახრილი დგას, ბაბი, მარი და ანა გარშემო დახტუნავენ და ყვირიან – გააგრძელებს, აბა რას იზამს! აბა რას იზამს! : ) მარიამი ისევ დუმს.

- რამდენი ხანია, რაც ბზიკების სტუდიაში ხარ?

- 2 წელია.

- კონცერტები თუ გაქვთ, სადაც შენც გამოდიხარ?

- კი, საკმაოდ ხშირად იმართება კონცერტები თბილისში და ვმონაწილეობ ხოლმე.

- ნიჭიერში უცხოურ რეპერტუარს ასრულებ, ქართულ სიმღერებს მღერი ხოლმე ისე?

- არა, ადრე ვმღეროდი, შემდეგ ეს სტილი ავირჩიე. თუმცა, როცა სიტუაცია მოითხოვს, ქართულსაც ვმღერი.

- ვინ არიან შენი საყვარელი მომღერლები?

- უიტნი ჰიუსტონი, ბიონსი, ჯენიფერ გადსონი, ჯენიფერ ჰოლიდეი.

- თუ გაქვს საყვარელი სიმღერა შენი რეპერტუარიდან, რომელსაც კონცერტების და რეპეტიციების გარეშეც, შენთვის სახლში ხშირად მღერი?

- ბევრია ასეთი, თუმცა განსაკუთრებით მიყვარს And I’m telling you.

- რას ეტყოდი შენს უამრავ გულშემატკივარს?

- დიდი მადლობა ყველას, დამიმესიჯეთ!

მარიამის კასტინგის ვიდეო:

მარიამი ნახევარფინალში:

გულნაზი გოლეთიანი – ეს სახელი საქართველოშიც და მის ფარგლებს გარეთაც ალბათ ყველამ იცის. მისი სიმღერის შემდეგ უამრავი წერილი მივიღეთ აქ მცხოვრები ადამიანებისგანაც და ემიგრანტებისგანაც, ისინი სიყვარულს გამოხატავდნენ გულნაზისადმი და მადლობას უხდიდნენ მას იმ ემოციებისათვის, რომელიც თითოეულ ჩვენგანში მისმა სიმღერამ გამოიწვია. თავადაც ამბობს, რომ იმ სამმა წუთმა მთელი მისი ცხოვრება შეცვალა, “ნიჭიერმა” ის უბედნიერეს ადამიანად აქცია და დიდი ხნის ოცნება, რომელსაც გულში ინახავდა, აუსრულა. გულნაზი გოლეთიანის შესახებ პოსტი შეგიძლიათ აქ წაიკითხოთ.

- ვოკალის მასწავლებელთან ემზადებოდით?

- არა, არასდროს მოვმზადებულვარ სიმღერაში.

- რამდენი ხანია, რაც მღერით?

- ბავშვობიდან ვმღერი, ჩემთვის, რა თქმა უნდა, დიდ სცენაზე არასდროს გავსულვარ.

- ელოდებოდით, რომ ხალხის რჩეული გახდებოდით?

- არ ველოდებოდი, გულის სიღრმეში კი მქონდა იმედი, მაგრამ მაინც არ ველოდებოდი. იმ წუთში სისხლი გამეყინა, ნაბიჯი ძლივს გადავდგი თიკასკენ და ვანიკოსკენ. უბედნიერესი წუთები იყო.

- სიმღერას “ნიჭიერის” შემდეგ გააგრძელებთ?

- კი, სანამ შემეძლება, აუცილებლად ვიმღერებ.

- სადმე თუ მუშაობთ?

- ამჟამად ჩვენი რაიონის კულტურის სახლში ვმუშაობ.

- რას ეტყვით გულშემატკივრებს?

- დიდ მადლობას! ვეცდები, მთელი ენერგია და შემართება ჩავდო ჩემს სიმღერაში, მინდა, რომ თქვენი გულები გავახარო!

გულნაზი გოლეთიანი კასტინგზე:

გულნაზი გოლეთიანი ნახევარფინალში:

ვერკა და გიორგი ერთადერთი წყვილია სამეჯლისო ცეკვის ნომრით, რომლებიც ფინალში მოხვდნენ. გულშემატკივრების გამოხმაურების მიხედვით, იმ სამი წყვილიდან, რომლებიც ნახევარფინალში გადავიდნენ, ვერკამ და გიორგიმ ხალხის ყველაზე დიდი სიმპათია დაიმსახურა. ამის გამო ჟიურიმ მათ მეორე შანსი მისცა და 2 დამატებითი ფინალისტის არჩევისას ხუთეულში დაასახელა, რის შემდეგაც უკვე მაყურებლებმა გააკეთეს არჩევანი და წყვილი ფინალში გადაიყვანეს. მიუხედავად იმისა, რომ კასტინგების დროს მათი ნომერი ძალიან ცოტა ხნით გამოჩნდა ეკრანზე, მათ მოახერხეს უამრავი ადამიანის გული მოეგოთ. დამატებითი ინფორმაციისთვის ვერკასა და გიორგის შესახებ შეგიძლიათ ეს პოსტი ნახოთ.

- სად სწავლობთ?

- ილია ჭავჭავაძის სახელმწიფო უნივერსიტეტში, სპორტის ფაკულტეტზე. გიორგი მე-4 კურსზეა, ვერკა – მე-3-ზე.

- ჭიათურაში ხშირად ჩადიხართ ხოლმე?

- კი, ძალიან ხშირად ჩავდივართ.

- როდის დაიწყეთ ცეკვა?

- ვერკამ 7 წლიდან დაიწყო, თუმცა მანამდე ქართულს ცეკვავდა, სამეჯლისო ცეკვებს კი 13 წლიდან მიჰყო ხელი. გიორგი 12-13 წლის იყო და პირდაპირ სამეჯლისო ცეკვებით დაიწყო. ცოტა ხანი ქართულ ცეკვებზეც იარა, მაგრამ სამეჯლისო უფრო ახლოს იყო მასთან.

- ელოდებით, რომ მეორე შანსი მოგეცემოდათ და 5-ეულში დაგასახელებდათ ჟიური?

- გეგას კომენტარის შემდეგ, მართალი რომ გითხრათ, ველოდით და ძალიან გაგვიხარდა.

- სად გაიცანით ერთმანეთი?

- ჩვენ მეზობლები ვართ ჭიათურაში, შემდეგ ცეკვაზეც ერთად დავიწყეთ სიარული და დავახლოვდით.

- მოსწავლეები გყავთ? ვინმეს ასწავლოთ ცეკვას?

- არა, ჯერჯერობით მოსწავლეები არ გვყავს.

- რას ეტყოდით თქვენს გულშემატკივრებს?

- უღრმესი მადლობა ყველას, ძალიან გვიყვარხართ, ყველაფერს გავაკეთებთ იმისთვის, რომ თქვენი იმედები გავამართლოთ და ორჯერ და სამჯერ უფრო ძლიერად გვიგულშემატკივროთ.

ვერკა და გიორგი კასტინგზე:

ვერკა და გიორგი ნახევარფინალში:

პატარა მარიამი ულამაზესი თვალებით და ხმით ხალხის ფავორიტი გახდა და ფინალისტების სიას შეუერთდა. კასტინგის სიმღერის შემდეგ მას მოფერებით “პატარა მერცხალს” ეძახიან. შეუძლებელია მისდამი სიმპათიები არგაგიჩნდეს – პატარა, ლამაზი, უმანკო ბავშვი, რომელსაც გამარჯვება იმიტომ სურს, რომ ბებია და მამიკო გაახაროს. სამწუხაროდ, მისთვის კითხვების დასმა ვერ მოვახერხეთ, ამიტომ გთავაზობთ ნახევარფინალის წინ მის შესახებ გაკეთებულ პოსტს:

მარიამი ჯერ კიდევ მაშინ ამღერდა, როცა ლაპარაკიც კი არ იცოდა. ტელევიზორში გაგონილ მუსიკას ყოველთვის ღიღინით ჰყვებოდა. სცენაზე პირველად 4 წლის ასაკში გამოვიდა.  მარიამი სტუდია “ენკი-ბენკი”-ს მოსწავლეა. ეს  სტუდია ფოთში პერიოდულად მართავს ფესტივალებს და მარიამიც ხშირად მონაწილეობს.

გარდა ამისა, მარიამმა მონაწილეობა მიიღო ფოთის ტელეკომპანიის მიერ ორგანიზებულ კონკურსში “მხიარული ტალღა” და გახდა ორგანიზატორთა სიმპატია.

მომავალში ძალიან უნდა, რომ მომღერალი გამოვიდეს. ასევე აპირებს ვიოლინოს და ფორტეპიანოს შესწავლას. თამაშობს ჭადრაკს. სკოლაში კარგი მოსწავლეა და ყველა საგანს ერთნაირი სიძლიერით ითვისებს!

მარიამი კასტინგზე:

მარიამი ნახევარფინალში:

4-მა ბიჭმა კასტინგის ნომრის პირველივე წამებიდან დაატყვევა ყველა. სიტყვა “პარკური” ბევრს საერთოდ გაგონილი არ ჰქონდა, ახლა უკვე მთელმა საქართველომ იცის, რომ არსებობს სპორტის ასეთი სახეობა. ტრეისერები – ის ადამიანები, რომლებიც პარკურს მისდევენ – განსაკუთრებული ნიჭით და ნებისყოფით დაჯილდოებული ადამიანები არიან, ბევრს ვარჯიშობენ და მიზანსაც აღწევენ – ალბათ ეს მაქსიმუმია, რაც შეიძლება ადამიანმა იფრინოს ფრთების გარეშე. პარკურმა კასტიგნზეც და ნახევარფინალშიც მთელი საქართველო აალაპარაკა და იმედი გვაქვს, ფინალშიც ისევე გაგვაოგნებენ, როგორც ეს წინა ორ შემთხვევაში მოხვდა. მათ შესახებ დამატებითი ინფორმაციის წაკითხვა აქ შეგიძლიათ.

- როგორ არის ვატო, პარკურის წევრი, რომელმაც რეპეტიციის დროს ლავიწის ძვალი მოიტეხა?

ვატო: – ტკივილი მაქვს, მაგრამ გამაყუჩებლებს ვსვამ, მალე გადამივლის. მომენატრა ფრენა, ერთი სული მაქვს, როდის გავა 2 თვე და ისევ გავაგრძელებ ბიჭებთან ერთად ვარჯიშს. ყველას დიდი მადლობა, ვინც დაინტერესდით ჩემი ჯანმრთელობით, ღმერთი გფარავდეთ.

- ფინალურ შოუში რას შემოგვთავაზებთ?

- ყველანაირად ვეცდებით, რომ კარგი შოუ იყოს, ეფექტური სანახაობა. ნომერი სცენაზე კვირას ღამე უნდა დავდგათ, იდეის მონახაზი გვაქვს, მაგრამ ფიზიკურად ახლა უნდა განვახორციელოთ და ვივარჯიშოთ, დრო ძალიან ცოტაა, მაგრამ იმედი გვაქვს, მაყურებელს მაინც მოეწონება.

- სად ხტუნავთ ხოლმე?

- თითქმის ყველა უბანში.

- ბევრი ვარჯიში სჭირდება პარკურს?

- ძალიან ბევრი. ვარჯიშზე მეტი ნებისყოფა სჭირდება. ხშირად არის შემთხვევები, როცა რაღაც არ გამოდის, აკეთებ და კიდევ არ გამოდის, გინდა, რომ მიანებო თავი, თქვა, რომ მორჩა, აღარ მინდა ამის გაკეთება… მაგრამ ნებისყოფა უნდა მოიკრიბო და გააგრძელო ვარჯიში.

- მოტეხილობები და ტრავმები ხშირია?

- ახალი დაწყებული რომ გვქონდა, კი, ხშირი იყო. ახლა წვრილ-წვრილი ტრავმები და ნაღრძობები გვაქვს ხოლმე. ტკივილი სულ არის, მაგის გარეშე არ გამოდის.

პატარა ტრეისერს, ავთოს, ჯერ არაფერი დაშავებია. “არც გამტეხვია, არც მომტეხვია,” – ამაყად ამბობს ავთო.

რთულს არაფერს ვაკეთებინებთ ჯერჯერობით, ვუფრთხილდებით, – ამატებს გივი.

- ყველაზე რთული რა შეგისრულებიათ?

- 16-სართულიან კორპუსზე ავძვერით. შეგიძლიათ ვიდეოც ნახოთ:

- თქვენს სასტავში როგორ მოვხვდეთ?

- ამას ბევრი გვეკითხება, ჯგუფში ვერავის ავიყვანთ, სამწუხაროდ, მაგრამ რითიც შეგვეძლება, ყველაფრით დავეხმარებით.

- რას ეტყოდით თქვენს გულშემატკივრებს?

- გამარჯვების შემთხვევაში სპეციალურ დარბაზს გავაკეთებთ და ყველა მსურველს ვასწავლით პარკურს. ყველა გულშემატკივარს ძალიან დიდი მადლობა!

პარკური – კასტინგის ვიდეო:

პარკური – ნახევარფინალი:

ანა ხანჩალიანი – გოგონა, რომლის ხმამაც უამრავი ადამიანის გული დაიპყრო, ნიჭიერის ნახევარფინალზე ხალხის რჩეული გახდა და ფინალის ერთ-ერთ ფავორიტად მოიაზრება. გარდა იმისა, რომ ძალიან საყვარელი, ლამაზი და ნიჭიერი ბავშვია, ურთიერთობაშიც საოცრად თბილი და უშუალოა, ზრდილობიანი და მორიდებული. მის შესახებ დამატებითი ინფორმაცია აქ შეგიძლიათ წაიკითხოთ.

- ვოკალის მასწავლებელი მართლა არ გყავს?

- არა, არ მყავს, არ მოვმზადებულვარ სიმღერაში არასდროს.

- ვიოლინოს სწავლა რატომ გადაწყვიტე?

- ბავშვობიდანვე ვოცნებობდი, მცოდნოდა ვიოლინოზე დაკვრა. 6 წელი ვსწავლობდი ფორტეპიანოს, შემდეგ შემომთავაზეს მეორე ინსტრუმენტის დამატება და ვიოლინო ავირჩიე.

- მარიამ კახელიშვილს ძლიერ კონკურენტად თვლი?

- კი, ის ძალიან ნიჭიერი ადამიანია. არამხოლოდ ის, ფინალში ბევრი ძალიან ნიჭიერი კონკურსანტი შეიკრიბა.

- რაიმე მუსიკალურ კონკურსზე თუ გიმღერია?

- არა, არასდროს მიმიღია კონკურსებში მონაწილეობა.

- რატომ?

- ძირითადად იმის გამო, რომ მაგის შესაძლებლობა არ გვქონდა ხოლმე.

- რამდენიმე კითხვა იყო, ანას შეყვარებული თუ ჰყავსო…

(გაოცებული თვალებით მიყურებს) – კი, მაგრამ ეგ რაში აინტერესებთ?

- რა ვიცი, აინტერესებთ : )

(ძალიან დარცხვენილი) - არა, არ მყავს.

- სულ უცხოურ სიმღერებს მღერი, ქართული სიმღერები თუ გაქვს რეპერტუარში?

- ბავშვობიდან ქართულ სიმღერებს ვმღერი, ჩემი უსაყვარლესი სიმღერაა ცაბაძის “ალიონზე გამიღიმა თბილისმა”. უბრალოდ ახლა უცხოენოვანი სიმღერები ვარჩიე.

- შენი საყვარელი მომღერლები ვინ არიან?

(აქ იბნევა, ბევრნი არიან და როგორ ჩამოვთვალოო, და მთხოვს, რომ ცოტა დრო მივცე მოსაფიქრებლად)

- ბიორკი, ბარბრა სტრეიზანდი, სელინ დიონი, ვიტნი ჰიუსტონი.

- ვინმე დაინტერესდა შენი ვოკალით? რაიმე შემოთავაზება გქონდა?

- ჯერჯერობით არანაირი, მხოლოდ ერთი ადამიანი დამიკავშირდა ფილადელფიიდან და საჩუქარი გამომიგზავნა.

- ელოდი, რომ ხალხის რჩეული გახდებოდი?

- არ ველოდი. სცენაზე ძალიან შემრცხვა ემოციების გამოვლენა, თუმცა კულისებში რომ გავედი, ვხტუნავდი სიხარულით, სახლშიც სულ დავხტოდი, ძალიან ბედნიერი ვიყავი.

- რას ეტყვი გულშემატკივრებს?

- ყველას ძალიან დიდი მადლობა, იმ ადამიანებსაც, ვისაც მესიჯის გამოგზავნის საშუალება არ ჰქონდა, მაგრამ ამის გარეშე მიჭერდნენ მხარს. დიდი იმედი მაქვს, რომ ახლაც მიგულშემატკივრებენ.

ანა კასტინგზე:

ანა ნახევარფინალში:

ნიჭიერის ფინალისტებზე ბევრს საუბრობენ, ზოგის ნიჭიერებას ეჭვქვეშ აყენებენ, თვლიან, რომ არ იმსახურებდა ფინალს. მაგრამ ყველა, ნიჭიერის ყველაზე გულფიცხი კრიტიკოსებიც კი ერთ რამეზე თანხმდებიან – ავთო ნაცარაშვილი უდაოდ ძალიან ნიჭიერი ადამიანია. “ნიჭიერის” სცენაზე მან პროფესიონალიზმის სულ სხვა დონე აჩვენა, ბევრად მაღალი, რასაც ის ადამიანებიც კი ადვილად მიხვდნენ, რომლებსაც მუსიკასთან არანაირი შეხება არ ჰქონდათ. ავთო ნაცარაშვილის ნიჭის, ნებისყოფისა და პროფესიონალიზმისადმი შეუძლებელია არ გაგიჩნდეს უდიდესი მოწიწების და პატივისცემის გრძნობა. მის შესახებ დამატებითი ინფორმაციის წაკითხვა ამ პოსტში შეგიძლიათ.

- მოსწავლეები თუ გყავთ და თუ ასწავლით გიტარაზე დაკვრას?

- ადრე მყავდა მოსწავლეები. ახლა ჯერჯერობით ჩემს თავს ვამეცადინებ. კარგ ფორმაში რომ ჩავდგები, შემდეგ მოსწავლეებსაც ავიყვან.

- Deep purple გიყვართ?

- კი, ძალიან, ჩემს ბავშვობაში ეტალონები იყვნენ, მათგან ბევრი რამ ვისწავლე, ფაქტიურად, ჩემი მასწავლებლები არიან.

- დღეში რამდენ საათს მეცადინეობთ?

- როცა კარგად ვმეცადინეობ – სულ ცოტა 8 საათი მჭირდება. ხანდახან 11 ან 12 საათიც მივარჯიშია.

- რომელი კუთხიდან ხართ?

- კახელი ვარ.

- სად შეიძლება თქვენი მოსმენა?

- ჯერჯერობით არსად, თუმცა ამჟამად დისკზე ვმუშაობ, რომელსაც აუცილებლად დავდებ ინტერნეტში და ხალხს შეეძლება გადმოწეროს და მოუსმინოს ჩემს შემოქმედებას.

- რამდენი კომპოზიცია გაქვთ სულ დაწერილი?

- დაწერილი უამრავი მაქვს, თუმცა ამჟამად 12 მათგანზე ვმუშაობ.

- რას ეტყოდით თქვენს გულშემატკივრებს?

- დიდ მადლობას მოვახსენებ. მინდა, რომ იმედიანად იყვნენ – სამომავლო გეგმები მაქვს, აუცილებლად შევთავაზებ მათ კარგ კომპოზიციებს და სიმღერებსაც!

ავთო ნაცარაშვილი კასტინგზე:

ავთო ნაცარაშვილი ნახევარფინალში:

16 წლის გუგა ჭყონია გარდა იმისა, რომ ფეხბურთელია და აპირებს ამ სპორტს გაჰყვეს, განსაკუთრებული ნიჭითაცაა დაჯილდოებული – მას კარგად ეხერხება მუსიკალური ინსტრუმენტების, ხშირად კი – რამდენიმეს ერთად მიბაძვა. გუგა ჭყონიას გამოჩენამდე საქართველოში უამრავმა ადამიანმა საერთოდ არ იცოდა, რას ნიშნავს ბიტბოქსი, ახლა კი ამ ჟანრს უკვე თავისი თაყვანისმცემლებიც ჰყავს, რაც მთლიანად გუგას დამსახურებაა. მისი ბიოს ხილვა შეგიძლიათ აქ. კითხვებზე პასუხს რაც შეეხება – საკმაოდ სიტყვაძუნწი რესპოდენტია, ალბათ უნდა გვეთხოვა, რომ ჩვეულებრივად კი არა, ბიტბოქსით გაეცა პასუხები.

- რამდენი წელია, რაც ბიტბოქსს აკეთებ?

- ერთ წელზე ცოტა მეტია. (ფიქრობს) ერთი წელი და 2 თვეა!

- თუ ვერ გაიმარჯვე, გააგრძელებ ბიტბოქსს?

- კი, რა თქმა უნდა!

- როგორი გოგოები მოგწონს?

- გარეგნობას დიდ ყურადღებას ვანიჭებ. განათლებული უნდა იყოს და თავშეკავებული.

- შეყვარებული გყავს?

- არა, არ მყავს!

- ფინალზე რამდენ სიმღერას შეასრულებ ერთ ნომერში?

- (დიდხანს ითვლის) დაახლოებით ათს.

- Beardyman მოგწონს?

- ჰმ, მომწონს? მომწონს? მომწონს კი არა, ფანი ვარ!

- როგორ ისწავლე ბიტბოქსი?

- ერთ ვიდეოს ვუყურე და მეც მომინდა ცდა, შემდეგ ბევრს ვვარჯიშობდი და ვისწავლე.

- ადვილია ბიტბოქსის სწავლა?

- ვისთვის როგორ, ზოგს ძალიან უძნელდება, ჩემთვის იმდენად რთული არაა.

- რამდენი ხანია, რაც ფეხბურთს თამაშობ?

- 5 წელია.

- ფეხბურთში რომელ გუნდს გულშემატკივრობ?

- არსენალს!

- რას ეტყოდი შენს გულშემატკივრებს?

- ყველას დიდ მადლობას ვუხდი, რომ გვერდში მიდგანან და მხარს მიჭერენ!

გუგა ჭყონია კასტინგზე:

გუგა ჭყონია ნახევარფინალზე:

ლევან შავაძემ არა მხოლოდ თავისი სიმღერებით, არამედ გარეგნობითაც კი ხალხს კიდევ ერთხელ გაახსენა ყველასთვის საყვარელი გოგი დოლიძე. ამ უნიჭიერესმა ადამიანმა, რომელსაც არასდროს მიუღია მუსიკალური განათლება და არ გასულა დიდ სცენაზე, საქართველოს გული დაიპყრო და ხალხის რჩეული გახდა ნახევარფინალურ კონცერტზე. მისი ბიოს ხილვა შეგიძლიათ ამ ლინკზე.

- რაიმე ანსამბლში თუ გიმღერიათ?

- კი, მიმღერია. ჩემი პირველი გამოსვლა ანსამბლთან ერთად იყო, 1986-87 წელს. ჩვენი სოფლის ანსამბლთან ერთად ვიმღერე, ეს პირველი შეხება იყო სცენასთან.

- მუსიკალური განათლება თუ გაქვთ?

- არა, არანაირი მუსიკალური განათლება არ მაქვს.

- ელოდით, რომ ხალხის რჩეული გახდებოდით? რა რეაქცია გქონდათ?

- კი, ველოდი. აღუწერელი, ენით უთქმელი იყო ის ემოცია, რაც დამეუფლა. ხალხის რჩეულობასთან ერთად ძალიან დიდი პასუხისმგებლობა მოდის, უნდა გაამართლო მათი იმედები, ბოლომდე უნდა დაიხარჯო გულშემატკივრებისათვის.

- ჩვენ მოგვწერა ერთმა პატარამ, 9 წლის ლიკამ და გვითხრა, რომ თქვენი დიდი გულშემატკივარია, შევპირდით, რომ აუცილებლად გადმოგცემდით ამას.

- ძალიან დიდი მადლობა. მინდა ვუთხრა მასაც და ყველას, რომ თურმე ცხოვრებაში გვიანი არაფერი არ არის. თუ რაიმე ნიჭითაა დაჯილდოებული ან ოცნება აქვს, აუცილებლად მისდიოს ბოლომდე.

- მუსიკალურ კონკურსებში მონაწილეობა მიგიღიათ?

- დიდი სიამოვნებით მივიღებდი მონაწილეობას, მაგრამ ასაკობრივი შეზღუდვა იყო. ახლა მე ბედმა გამიღიმა, ასაკში მომეცა ოცნების განხორციელების შანსი.

- რას ეტყვით თქვენს გულშემატკივრებს?

- ყოველთვის, როცა ვიმღერებ, მე მათთვის ვიმღერებ და არა საკუთარი თავისთვის.

ლევან შავაძე კასტინგზე:

ლევან შავაძის გამოსვლა ნახევარფინალში:

მარი და ბაბი ბაღიდან განუყრელი მეგობრები არიან და ფინალშიც ერთად მოხვდნენ, მათმა დუეტმა მაყურებლის სიმპათია დაიმსახურა და ხალხის რჩეულები გახდნენ. ორი ულამაზესი გოგონა ულამაზესი ხმით ფინალისთვის ულამაზეს ნომერს გვპირდება. მარისა და ბაბის ბიოს ხილვა შეგიძლიათ ამ ლინკზე.

- დიდი ხანია მღერით?

- ბაღიდან ვმღერით, სერიოზულად უკვე სკოლიდან დავიწყეთ სიმღერა, სკოლაში მოწყობილ ჯაზის კონცერტებზე გამოვდიოდით ხოლმე.

- მუსიკალურ კონკურსებში მონაწილეობის მიღებაზე არ გიფიქრიათ?

- გვიფიქრია, ძალიან გვინდოდა, მაგრამ ასაკობრივი შეზღუდვა იყო ხოლმე, ამიტომ, როდესაც გავიგეთ, რომ “ნიჭიერში” ნებისმიერი ასაკის ადამიანს შეეძლო მონაწილეობის მიღება, გადავწყვიტეთ მოვსულიყავით.

- ელოდით, რომ ხალხის რჩეული გახდებოდით?

- არა, არ ველოდით, ძალიან მოულოდნელი იყო ჩვენთვის.

- ამასთან დაკავშირებით ინტერნეტში აჟიოტაჟი ატყდა, ბევრი წერდა, რომ თქვენ გადასვლას არ იმსახურებდით. რას ფიქრობთ ამაზე?

- ძალიან გული გვეტკინა, როდესაც ვნახეთ ბლოგზე კომენტარები, თითქოს “მილიონერი მამიკოები” გვყავს და ამიტომ გადავედით. ეს ყველაფერი სიმართლეს არ შეესაბამება, ჩვენთვისაც მოულოდნელი იყო ხალხის ხმებით რომ მოვხვდით ფინალში.

ჩვენ სულ სკოლის ცხოვრებით ვცხოვრობთ, დილიდან საღამომდე იქ ვართ, სკოლაში ყველა ძალიან ახლოსაა ერთმანეთთან და ირგვლივ სულ სითბოა, ამიტომ ძალიან განვიცადეთ, უცებ როდესაც ამხელა აგრესია წამოვიდა ჩვენზე. თუმცა, საბედნიეროდ, მხარდამჭერიც ბევრი გვყავს.

- თქვენი საყვარელი მომღერლები?

- ვიტნი ჰიუსტონი, ბარბრა სტრეიზანდი, რეი ჩარლზი, ბიორკი…

- სამომავლოდ რას აპირებთ?

- ზუსტად არ ვიცით, თუმცა მუსიკალური განათლების მიღება ძალიან გვინდა.

- მუსიკალური განათლება არ გაქვთ? მასწავლებელი გყავთ?

- არა, არანაირი მუსიკალური განათლება არ გვაქვს და არც მასწავლებელი გვყავს.

- რას ეტყოდით თქვენს გულშემატკივრებს?

- ყველას დიდ მადლობას ვუხდით, ყველა გვიყვარს (ვისაც ვუყვარვართ – ამატებს ბაბი), მომავალშიც აუცილებლად გაიგებთ ჩვენს სახელებს!

მარი და ბაბი კასტინგზე:

მარი და ბაბი ნახევარფინალში:

თქვენს კითხვებს პირველი next level უპასუხებს. ეს ერთადერთი ჯგუფია, რომელმაც ფინალში გადასვლა მოახერხა და ჟანრში კონკურენტები უკან მოიტოვა. კარგი შოუ, სინქრონი, რთული მოძრაობები და შინაარსობრივი ცეკვა – ჯგუფმა ღირსეულად მიიღო საგზური ფინალისკენ და ფინალშიც შთამბეჭდავ ნომერს გვპირდება. Next Level-ის ბიოს ხილვა შეგიძლიათ ამ ლინკზე.

- ვინ არიან ჯგუფის წევრები?

- ფინალში Next Level-ის 5 წევრი იცეკვებს: გიორგი ახალაძე, ირაკლი ლომიძე, ამიკო სამადაშვილი, ზურა მამისაშვილი და გაია კეროკიანი.

- თქვენი ჯგუფი და New style ადრე მართლა ერთი ჯგუფი იყო?

- კი, თავიდან New style-ში ვიყავით ამიკო, ირაკლი, ზურა და ნიუ სთაილის გიორგი (დიჯი). შემდეგ რაღაც უთანხმოების გამო გავიყავით, დიჯიმ new style განაგრძო, ჩვენ კი ახალ ლეველზე გადავედით და next level შევქმენით.

- ამიკოს: შენთან მეგობრობა შეიძლება?

ამიკო: – კი, შეიძლება :)

- “ნიჭიერის” შემდეგ ვინმე თუ დაინტერესდა თქვენით, რაიმე შემოთავაზება გქონდათ?

- კი, ერთი ცნობილი ღამის კლუბი დაგვიკავშირდა და თანამშრომლობა შემოგვთავაზა.

- სად ცხოვრობთ?

- ნაწილი – რუსთავში, ნაწილი – ვარკეთილში.

- ფინალის ნომერი თქვენ თვითონ მოამზადეთ?

- კი, ისევე, როგორც კასტინგისა და ნახევარფინალის ნომრები, იდეაც და ქორეოგრაფიაც ჩვენია.

- გიორგი ახალაძეს შეყვარებული ჰყავს?

გიორგი: - არა, არ მყავს, ასე რომ მებრდღვენით!

- რას ეტყოდით თქვენს გულშემატკივრებს?

- უდიდეს მადლობას, ჩვენ ყველაფერს გავაკეთებთ იმისთვის, რომ თქვენი იმედები არ გავაცრუოთ და დაუვიწყარი შოუ შემოგთავაზოთ!

Next Level კასტინგზე:

ნახევარფინალის ვიდეო:

ფინალის წინ ყველაზე მეტად პროექტის გუნდი ღელავს. უნდათ, რომ ყველაფერი ისეთივე წარმატებით დაგვირგვინდეს, როგორი წარმატებულიც იყო “ნიჭიერი” მთელი ამ სამი თვის მანძილზე… მიუხედავად მათი გადატვირთული სამუშაო გრაფიკისა, მაინც მოვახერხეთ  გასაუბრება და შემოგთავაზებთ რამდენიმე მათგანის კომენტარს ზოგადად პროექტისა და ხვალინდელი ფინალური შოუს შესახებ:

აღმასრულებელი პროდიუსერები

გიორგი ხაბურზანია:

“ნამდვილად არ ველოდი, თუ ასეთი რეიტინგული იქნებოდა “ნიჭიერი”. ამ შოუმ დაამტკიცა, რომ ტელესივრცეში შესაძლებელია ისეთი პროექტის შექმნა, რომელიც ნებისმიერი ადამიანისათვის საინტერესოა. მივიღეთ ფენომენალური მოვლენა. არ ვაჭარბებ და ოფიციალურ რეიტინგებზე დაყრდნობით შემიძლია ვთქვა, რომ როდესაც ნიჭიერი გადის ეთერში, 10 ტელევიზორიდან 9 რუსთავი2-ზეა გადართული!

გარდა ამისა, ეს ერთადერთი პროექტია, სადაც არა მარტო ფინალში, არამედ ნახევარფინალში და უბრალოდ კასტინგზე მოხვედრილებისთვისაც კი უდიდესი პერსპექტივა ისახება. მე დარწმუნებული ვარ, რომ ეს ხალხი კიდევ შეგვახსენებს თავს მომავალში. ზოგისთვის ეს ბოლო შანსი იყო, ზოგისთვის ყველაფერი ახლა იწყება, მაგრამ რაც მთავარია, თითოეულმა მონაწილემ  მიაღწია იმას, რომ ისინი ძალიან დიდხანს ემახსოვრება საზოგადოებას.

რაც შეეხება ფინალს, დარწმუნებით შემიძლია ვთქვა, ეს იქნება უპრეცენდენტოდ სანახაობრივი შოუ ქართულ ტელესივრცეში! ”

გარდა ამისა, გიორგი ხაბურზანიას ვკითხეთ ისიც, რის შესახებაც უამრავი e-mail-ი თუ კომენტარი იწერება: “იქნება, თუ არა ნიჭიერის მეორე სეზონი?” როგორც აღმოჩნდა, მეორე სეზონი აუცილებლად იქნება. კასტინგები სავარაუდოდ ივნისიდან დაიწყება და დაწვრილებითი ინფორმაცია სწორედ აქ, ნიჭიერის ბლოგზე დაიწერება!

დემნა ჯაფარიძე:

“დაახლოებით ერთი წელი გვქონდა მე და გიორგის მსჯელობა ამ პროექტის გაკეთებასთან დაკავშირებით. როდესაც სხვა შოუების კასტინგებზე დავდიოდით, ვხვდებოდით უამრავ ნიჭიერ ადამიანს, რომლებსაც არ ჰქონდათ სცენა, სადაც შეძლებდნენ საკუთარი ნიჭის გამოვლენას.  ვიცოდით, რომ აქ მოვიდოდა ძალიან ბევრი განსაკუთრებული ადამიანი… წარმატების ერთ-ერთი მიზეზი ალბათ ისიც იყო, რომ პროექტის თითოეულ თანამშრომელს შეუყვარდა “ნიჭიერი”! ვფიქრობ, რაც ჩავდეთ ამ ყველაფერში, იმასვე ვიღებთ უკან…”

შინაარსის პროდიუსერი

დადუ ლომინაძე:

“ეს პროექტი გამოვიდა ნამდვილად სახალხო… ჩვენ მთელი საქართველო მოვიარეთ, აბსოლუტურად ყველა კუთხეში გვქონდა კასტინგები და გარკვეულწილად ველოდით კიდეც, რომ მთელი მოსახლეობა ჩართული იქნებოდა, მაგრამ შედეგმა გადააჭარბა მოლოდინს – ყველა კუთხეში, ყველა ქალაქში, ყველა ოჯახში ორშაბათი ნიჭიერის დღეა! განურჩევლად სოციალური მდგომარეობისა, ასაკისა, სქესისა, თითოეული მათგანი  მაქსიმალურად ჩართულია ამ პროექტში და ალბათ გადაჭარბებული არ იქნება ნათქვამი, რომ მარტო ორშაბათი არ არის ნიჭიერის დღე, დანარჩენი დღეების მანძილზეც გასული ორშაბათის განხილვა ხდება. ეს დიდი წარმატებაა და ყველას ძალიან გვიხარია, რომ ჩვენმა თავდაუზოგავმა შრომამ ასეთი შედეგი გამოიღო.

რაც შეეხება ფინალს, შემიძლია ვთქვა, რომ ეს იქნება შოუ, რომელიც ყველამ უნდა ნახოს! პროექტის არც ერთ ანალოგს არ ახსოვს ისეთი ფინალი, სადაც 7 სრულიად განსხვავებული ჟანრის ნომერს ვიხილავთ. წარმოიდგინეთ, ერთ შოუში- break dance, სამეჯლისო ცეკვა, ილუზიონისტი, პარკური, ბიტბოქსი, გიტარისტი, მომღერლები… ”

სეგმენტ-პროდიუსერი

თათუკა ნარტყოშვილი:

“ფინალის  შესახებ მინდა გითხრათ, რომ ეს მართლა ყველაზე დიდი სატელევიზიო მოვლენაა 2010 წელს სატელევიზიო სივრცეში. ამაზე მნიშვნელოვანი მართლა არაფერი  მომხდარა… პროექტი ხომ გამოვიდა ყველაზე  წარმატებული და წარმოიდგინეთ, ეს იქნება ამ ყველაფრის კულმინაცია! თანაც ძალიან ძლიერმა კონკურსანტებმა მოიყარეს თავი ფინალში, თითოეულ მათგანს უამრავი გულშემატკივარი ჰყავს. ძალიან საინტერესოა ვინ გახდება ხალხის რჩეული. ეს ის შემთხვევაა, როცა წინასწარი პროგნოზების გაკეთება ძალიან ძნელია – ხალხმა უნდა აირჩიოს საუკეთესო საუკეთესოთა შორის. 3 მაისს ყველაზე მნიშვნელოვანი ორშაბათია ორშაბათებს შორის!

თანაც “ნიჭიერს” ის უნიკალურობა ახასიათებს, რომ აქ მხოლოდ ფავორიტ კონკურსანტს კი არა, სასურველ ჟანრსაც ირჩევ. ჟანრების სიმრავლით კი ნამდვილად დაიკვეხნის ფინალი…

აქვე, მინდა ორიოდე სიტყვა წამყვანებზეც დავამატო – ისინი აბსოლუტურად შეესაბამებიან პროექტის სახელს და  არიან ნამდვილად ნიჭიერები, რაშიც ალბათ მაყურებელიც დარწმუნებულია…”

წამყვანები

თიკა:

კასტინგის კულისებიდან ნახევარფინალებამდე ყველაფერს კონკურსანტებთან ერთად განვიცდიდით. ახლაც, ფინალში თითოეულ კონკურსანტს ვგულშემატკივრობ და  ჩვენთვისაც ისეთივე მნიშვნელოვანი დღეა, როგორიც მათთვის. ჩემთვის ყველა ძალიან ნიჭიერია, მაგრამ გამარჯვებული მხოლოდ ერთი იქნება და   ერთი სული მაქვს მოვიდეს წუთი, როდესაც გამოვაცხადებთ ყველაზე ნიჭიერს!

ვანიკო:

მთელი პროექტის მანძილზე, როგორც თიკამ აღნიშნა, ძალიან ბევრი დადებითი ემოცია მივიღეთ. ფინალი იმდენად საინტერესო იქნება, რომ თამამად შემიძლია ვთქვა – ეს წარმატებული პროექტის წარმატებული დასასრულია!

წინ “ნიჭიერის” გრანდიოზული ფინალი გველოდება! სულ ცოტა დრო დარჩა იმისთვის, რომ ხმა მისცეთ თქვენს ფავორიტს და დაეხმაროთ მას ქვეყნის ყველაზე ნიჭიერის სტატუსის მოპოვებაში!

ხვალ, მთელი დღის მანძილზე აუცილებლად ადევნეთ თვალი ჩვენს ბლოგსაც – ყოველ ნახევარ საათში ერთხელ აქ ახალი პოსტი დაგხვდებათ, დაიდება კონკურსანტების პასუხები კითხვებზე, რომლებსაც თქვენ უსვამდით მთელი კვირის მანძილზე კომენტარებისა და იმეილის საშუალებით, ასევე შემოგთავაზებთ რეპეტიციების დროს გადაღებულ ფოტომასალას.

“ნიჭიერის” ნახევარფინალისტმა, რამაზ გარშაულიშვილმა კონცერტზე პირობა დადო, თუ ფინალში მოხვდებოდა, თავის გულშემატკივარს დაუვიწყარ შოუს აჩუქებდა და მტკვარზე გაჭიმულ ბაგირზე ყოველგვარი დაცვის გარეშე გადაივლიდა. მიუხედავად იმისა, რომ რამაზი ფინალში ვერ მოხვდა, თავისი პირობა მაინც შეასრულა და მტკვრის მარჯვენა სანაპიროდან მარცხენაზე უმოკლესი გზით – მდინარეზე გაჭიმული ბაგირით გადავიდა.

გთავაზობთ კურიერის სიუჟეტს, სადაც რამაზ გარშაულიშვილმა პირდაპირ ეთერში შეასრულა ეს ურთულესი ნომერი: