ჯგუფი “წმინდა გიორგი”
კარატისტების ჯგუფი “წმინდა გიორგი” “ნიჭიერის” მეორე სეზონის ბოლო ქასთინგის ბოლო მონაწილე იყო! მათი ნომრით, მართლაც შთამბეჭდავად დასრულდა ქასთინგები და მაყურებლისგანაც დიდი მოწონება დაიმსახურეს. ამ კვირის ფავორიტებიც არიან და ინტერვიუს რუბრიკაში სწორედ ისინი მოვიწვიეთ.
იმდენად მრავალრიცხვოვანი ჯგუფია, პირდაპირ დარბაზში გადავწყვიტეთ მისვლა. ისინი ერთ-ერთი სკოლასთან მდებარე დარბაზში ვარჯიშობენ. შესვლისას, ბატონი კახაბერის გარშემო იყვნენ შემოკრებილები მოსწავლეები და მის დარიგებებს ისმენდნენ.
შემდეგ 200-200 პრესი და აზიდვა დაავალა მათ და გადმოინაცვლა ინტერვიუზე. სხვათაშორის, ამ დავალებისას გავიგე, რომ თუ პრესისას 10-ჯერ ჰაერში მაგრად “დაარტყავ” მუშტებს, 2000 პრესი გამოვა:))
ყველაზე პატარა:)
ნიჭიერში მოსვლის გადაწყვეტილება დიდი ხანია მიღებული ჰქონდათ, ვარჯიში სპეციალურად სცენისთვის კი სექტემბრიდან დაიწყეს. ჟიურის წინაშე 22 კარატისტი იღებდა მონაწილეობას, მათგან ყველაზე უმცროსი 6 წლის იყო, ყველაზე უფროსი კი 44 წლის. ისინი ვარჯიშს 3-4 საათს უთმობენ. წარმატებაც ბევრი აქვთ ნიჭიერამდე- ყოველთვის იღებენ სხვადსხვა ტურნირებში მონაწილეობას. თურქეთში, რუსეთში, უკრაინაში, ირანსა და იაპონიაში მრავალჯერ მოიპოვეს მოწინავე ადგილები.
პატარებთან დაკავშირებით ბევრი კურიოზი ხდება ვარჯიშებისას.ბატონი კახა დიდ დროს უთმობს ბავშვების სულიერ აღზრდასაც, ამიტომ ხშირად ესაუბრება რელიგიაზე, არიგებს მათ და ასწავლის როგორ უნდა მოიქცნენ. მოსწავლეებიც მიმართავენ, როცა კითხვა უჩნდებათ. ასე მაგალითად, ერთ-ერთმა ჰკითხა მარხვასთან დაკავშირებით, თევზის მირთმევა რა დღეებში იყო შესაძლებელი – “ყველას ხმამაღლა ვკითხე, აბა ბავშვებო, ეს დღეებია ხარება და…დაველოდე როგორ მეტყოდნენ “ბზობა”-ს. თუმცა ერთ-ერთმა პატარამ ყველას დაასწრო და წამოიძახა “გოგიაო” - მოგვიყვა მან :))
როგორც ნიჭიერში ვნახეთ, მათ მართლაც ძალიან ბევრი მოზარდი მოაშორეს ქუჩას და იქაურ ცხოვრებას. აქ 36 ობოლი ბავშვი მეცადინეობს უსასყიდლოდ, ასევე მრავლშვილიანი ოჯახის წარმომადგენლები და ინვალიდი, თუ განქორწინებული მშობლების მყოლი ბავშვები. დანარჩენები შესაწირის სახით ეხმარებიან ფედერაციას.
ნიჭიერში წარმოდგენილი ნომერი ძალიან მრავალფეროვანი იყო და მეტი სანახაობრიობა ქართული ცეკვის ელემენტებმა შესძინა. ამასთან დაკავშირებით ბატონმა კახამ მოგვიყვა: “ერთხელაც გადავწყვიტეთ გაგვეგო, რამდენი პრესის გაკეთებას შეძლებდნენ მოსწავლეები. მაქსიმუმი 700 გამოვიდა. პირადად მე, ფანი ვარ მთიულური და სვანური ცეკვისა და მათი რთული ტრიუკების, გადავწყვიტე სწორედ ქართული მელოდიების ფონზე მევარჯიშებინა. შედეგი მართლა შთამბეჭდავი გამოვიდა- მთიულური მუსიკის ფონზე 1200 პრესამდე ავიდნენ!”
თითოეული წევრი მეტ სტიმულს გრძნობს, რაც გეგამ, ვანომ და სოფომ ასეთი შეფასებები მისცეს “მადლობა მათ, იმისთვის, რომ სწორად აღიქვეს და დააფასეს ჩვენი შრომა. ასევე “ნიჭიერის” გუნდის თითოეულ წევრს. ბავშვები უფრო მოტივირებულები არიან, უფრო მონდომებით ვარჯიშობენ”.
ნიჭიერში გამოსვლის შემდეგ ძალიან დიდ მხარდაჭერს გრძნობენ მაყურებლის მხრიდანაც “უდიდესი მადლობა გულშემატკივრებს, უფლის წინაშე უდიდესი მადლიერების გრძნობით მადლობა. მათ გუნდთან მიიტანეს ეს სითბო, რომელიც ალბათ პატრიარქის ლოცვა-კურთხევით გადმოვიდა ჩვენზე. მიყვარხართ ყველა ქრისტეში. წინასწარ გილოცავთ ბზობას და აღდგომას” – ასე დაგვაბარა მკითხველებთან და გულშემატკივრებთან.
შემდეგ ტურში იმედი აქვთ, რომ ისეთივე შთაბეჭდილებას მოახდენენ და მაყურებელს, რომელმაც ისინი უკვე შეიყვარა, იმედს არ გაუცრუებენ და უფრო გაახარებენ. ჩვენც, წარმატებებს ვუსურვებთ მათ : )
