გუშინ ბოლო, მეხუთე ნახევარფინალი იყო, 11-დან 10 ფინალისტის ვინაობა უკვე ვიცით, მეთერთმეტეს ვინაობა ოთხშაბათს საღამოს  გაირკვევა, თუმცა, ასეა, თუ ისე, უკვე ძირითადი სტატისტიკა გვაქვს იმისთვის, რომ პროგნოზები გავაკეთოთ ფინალური შოუს შესახებ და ვთქვათ, რომ წლევანდელი ფინალი, ძალიან გამორჩეული, მრავალფეროვანი და უბრალოდ, ძალიან მაგარი შოუ იქნება!

პროექტის პრინციპი, ზოგადად ასეთია- ხალხმა უნდა აირჩიოს და არა ხალხს აურჩიონ, ამიტომაც, 5 ნახევარფინალის განმავლობაში, პირველ არჩევანს ყოველთვის მაყურებელი აკეთებდა და  მხოლოდ დარჩენილი 9 კონკურსანტიდან ირჩევდა ჟიური.

უფრო მეტი თვალსაჩინოებისთვის, გამოვყოთ, ამ სეზონზე ვინ გახდა ხალხის ფავორიტი და ვინ ჟიურის…

ხალხმა აირჩია:

• ნატალი ვეფხვაძე
• მარი ტომარაძე
• კათარზისის დუეტი
• დათიკაშვილების ოჯახი
• ვანო ფიფია

ჟიურის არჩევანი:

• acro style
• მოცეკვავეები ნიკა და ქეთი
• ბარმენი სანდრო ცისკაძე
• კარატისტების ჯგუფი წმინდა გიორგი
• მატრიცული პანტომიმა

წელს, შარშანდელის მსგავსად,  ვერ ავცდით “ნიჭიერია თუ ჯეოსტარი” ფრაზებს, თუმცა, ამ ფრაზის ავტორები სწორედ ის ადამიანები იყვნენ, ვინც ტელეეკრანებთან ისხდნენ და მათ ხელში იყო კონკურსანტების და შესაბამისად, “ნიჭიერი”-ს ფინალის ბედი.

მიუხედავად ამ ფრაზის რამდენიმე შემთხვევაში დომინირებისა, უნდა ითქვას, რომ შარშანაც და წელსაც ქართული “ნიჭიერის” ფინალი ყველა არსებულ ანალოგზე უფრო მრავალფეროვანი გამოვიდა!

10 მონაწილე და 6 განსხვავებული ჟანრი:

• მომღერალი (5 ხალხის რჩეული)
• აკრობატები
• ბარმენი
• სამეჯლისო ცეკვა
• კარატისტების ჯგუფი წმინდა გიორგი
• მატრიცული პანტომიმა-ჯგუფი ფანტომი.

წელს წარმოდგენილი 5 მომღერლიდან, ხუთივე რადიკალურად განსხვავდება ერთმანეთისგან. მეტი თვალსაჩინოებისთვის, შარშანდელი ფინალისტები გავიხსენოთ- გამუდმებით ადარებდნენ: გულნაზი გოლეთიანი, თუ ლევან შავაძე? მარიამ კახელიშვილი, თუ ანი ხანჩალიანი? წელს კი შეუძლებელია შეადარო მარი ტომარაძე და ვანო ფიფია, ნატალი ვეფხვაძე და კათარზისის მოხუცები… ყველა ინდივიდუალური, სხვადასხვა ჟანრში მომღერალი და განსხავებულია.

თანაც, მიუხედავად იმისა, რომ შარშან 6 სხვადასხვა ჟანრი გვქონდა ფინალში, აქცენტი მაინც მომღერლებზე ჰქონდათ. წელს კი, ეს სხვადასხა ჟანრები იმდენად შთამბეჭდავია, მხოლოდ მათზე ლაპარაკობენ და ხშირად არჩევანის გაკეთებაც  კი  ძნელდება, როცა საქმე  აკრო სტაილის პროფესიონალიზმს, მატრიცული პანტომიმის სანახაობას, თუ კარატისტების შთამბეჭდავ ნომერს ეხება!

მეთერთმეტე ფინალისტის შემთხვევაშიც, არჩევანი დიდია- ნიცა ყიფიანი, ბერმუხა, თავისუფალი, თეონა კოროშინაძე და დაკი- 5 განსხვავებული კონკურსანტი. მხოლოდ ხალხი გადაწყვეტს ვინ მოხვდება ფინალში- ნიცა, რომელიც ასაკის მიუხედავად ამ ჟანრში არ ჩამოუვარდება პროფესიონალებს, თუ უხუცესი მოცეკვავეები. ნამდვილი პოპ მომღერალი, თუ დაკი, რომელიც გარდა მოცეკვავეობისა, ფაკირიც არის და იოგაც (დანებსა და ლურსმნებზეც ცეკვავს).

ფაქტია, ჟიურიმ განსასჯელად ყველაზე გამორჩეულები გადმოგცათ თქვენ, მაყურებელს. პროექტი დემოკრატიულობის პრინციპით მუშაობს და ფინალში მხოლოდ თქვენ ირჩევთ გამარჯვებულს. პროექტის გუნდი ნამდვილად ამაყობს იმით, რომ ღირსეული არჩევანის საშუალება მოგცათ და ახლა ჯერი მხოლოდ თქვენზეა.

რაც შეეხება მომღერლებს, ვთვლით, რომ ხალხის არჩევანი დასაფასებელია. მათ აირჩიეს ძალიან კარგი, ჩამოყალიბებული მომღერალი ნატალი ვეფხვაძე, პერსპექტიული და ნიჭიერი მარიამ ტომარაძე, მოხუცები,რომლებიც ასაკის მიუხედავად მშვენივრად მღერიან და მათთვის ნიჭიერი ნათელი წერტილია, დათიკაშვილების ოჯახი, რომელთა ნიჭიერებაზეც არავინ დაობს და ვანო ფიფია, რომელსაც ძალიან ტკბილი ხმა აქვს და ემოციებით სავსე იყო მისი ორივე გამოსვლა ნიჭიერის სცენაზე! ქართული ფოლკლორი, ქართული შემოქმედება, არ არის ის სფერო, რომელიც ხელწამოსაკრავად შეიძლება აღიქვა და დაიწუნო მხოლოდ იმიტომ, რომ ქართულია…

დანარჩენი კი თავად განსაჯეთ, რამდენად კარგი შოუ გველის ორშაბათს, 6 ივნისს, მეორე სეზონის გრანდიოზულ ფინალზე! ხუთშაბათიდან,  მეთერთმეტე ფინალისტის გარკვევის შემდეგ თქვენ შეგეძლებათ ხმა მისცეთ მას, ვინც თქვენი ფავორიტია.

თქვენ ირჩევთ ყველაზე ნიჭიერს!

შემოუერთდით ფეისბუქზე event-ს

ფინალის წინ ყველაზე მეტად პროექტის გუნდი ღელავს. უნდათ, რომ ყველაფერი ისეთივე წარმატებით დაგვირგვინდეს, როგორი წარმატებულიც იყო “ნიჭიერი” მთელი ამ სამი თვის მანძილზე… მიუხედავად მათი გადატვირთული სამუშაო გრაფიკისა, მაინც მოვახერხეთ  გასაუბრება და შემოგთავაზებთ რამდენიმე მათგანის კომენტარს ზოგადად პროექტისა და ხვალინდელი ფინალური შოუს შესახებ:

აღმასრულებელი პროდიუსერები

გიორგი ხაბურზანია:

“ნამდვილად არ ველოდი, თუ ასეთი რეიტინგული იქნებოდა “ნიჭიერი”. ამ შოუმ დაამტკიცა, რომ ტელესივრცეში შესაძლებელია ისეთი პროექტის შექმნა, რომელიც ნებისმიერი ადამიანისათვის საინტერესოა. მივიღეთ ფენომენალური მოვლენა. არ ვაჭარბებ და ოფიციალურ რეიტინგებზე დაყრდნობით შემიძლია ვთქვა, რომ როდესაც ნიჭიერი გადის ეთერში, 10 ტელევიზორიდან 9 რუსთავი2-ზეა გადართული!

გარდა ამისა, ეს ერთადერთი პროექტია, სადაც არა მარტო ფინალში, არამედ ნახევარფინალში და უბრალოდ კასტინგზე მოხვედრილებისთვისაც კი უდიდესი პერსპექტივა ისახება. მე დარწმუნებული ვარ, რომ ეს ხალხი კიდევ შეგვახსენებს თავს მომავალში. ზოგისთვის ეს ბოლო შანსი იყო, ზოგისთვის ყველაფერი ახლა იწყება, მაგრამ რაც მთავარია, თითოეულმა მონაწილემ  მიაღწია იმას, რომ ისინი ძალიან დიდხანს ემახსოვრება საზოგადოებას.

რაც შეეხება ფინალს, დარწმუნებით შემიძლია ვთქვა, ეს იქნება უპრეცენდენტოდ სანახაობრივი შოუ ქართულ ტელესივრცეში! ”

გარდა ამისა, გიორგი ხაბურზანიას ვკითხეთ ისიც, რის შესახებაც უამრავი e-mail-ი თუ კომენტარი იწერება: “იქნება, თუ არა ნიჭიერის მეორე სეზონი?” როგორც აღმოჩნდა, მეორე სეზონი აუცილებლად იქნება. კასტინგები სავარაუდოდ ივნისიდან დაიწყება და დაწვრილებითი ინფორმაცია სწორედ აქ, ნიჭიერის ბლოგზე დაიწერება!

დემნა ჯაფარიძე:

“დაახლოებით ერთი წელი გვქონდა მე და გიორგის მსჯელობა ამ პროექტის გაკეთებასთან დაკავშირებით. როდესაც სხვა შოუების კასტინგებზე დავდიოდით, ვხვდებოდით უამრავ ნიჭიერ ადამიანს, რომლებსაც არ ჰქონდათ სცენა, სადაც შეძლებდნენ საკუთარი ნიჭის გამოვლენას.  ვიცოდით, რომ აქ მოვიდოდა ძალიან ბევრი განსაკუთრებული ადამიანი… წარმატების ერთ-ერთი მიზეზი ალბათ ისიც იყო, რომ პროექტის თითოეულ თანამშრომელს შეუყვარდა “ნიჭიერი”! ვფიქრობ, რაც ჩავდეთ ამ ყველაფერში, იმასვე ვიღებთ უკან…”

შინაარსის პროდიუსერი

დადუ ლომინაძე:

“ეს პროექტი გამოვიდა ნამდვილად სახალხო… ჩვენ მთელი საქართველო მოვიარეთ, აბსოლუტურად ყველა კუთხეში გვქონდა კასტინგები და გარკვეულწილად ველოდით კიდეც, რომ მთელი მოსახლეობა ჩართული იქნებოდა, მაგრამ შედეგმა გადააჭარბა მოლოდინს – ყველა კუთხეში, ყველა ქალაქში, ყველა ოჯახში ორშაბათი ნიჭიერის დღეა! განურჩევლად სოციალური მდგომარეობისა, ასაკისა, სქესისა, თითოეული მათგანი  მაქსიმალურად ჩართულია ამ პროექტში და ალბათ გადაჭარბებული არ იქნება ნათქვამი, რომ მარტო ორშაბათი არ არის ნიჭიერის დღე, დანარჩენი დღეების მანძილზეც გასული ორშაბათის განხილვა ხდება. ეს დიდი წარმატებაა და ყველას ძალიან გვიხარია, რომ ჩვენმა თავდაუზოგავმა შრომამ ასეთი შედეგი გამოიღო.

რაც შეეხება ფინალს, შემიძლია ვთქვა, რომ ეს იქნება შოუ, რომელიც ყველამ უნდა ნახოს! პროექტის არც ერთ ანალოგს არ ახსოვს ისეთი ფინალი, სადაც 7 სრულიად განსხვავებული ჟანრის ნომერს ვიხილავთ. წარმოიდგინეთ, ერთ შოუში- break dance, სამეჯლისო ცეკვა, ილუზიონისტი, პარკური, ბიტბოქსი, გიტარისტი, მომღერლები… ”

სეგმენტ-პროდიუსერი

თათუკა ნარტყოშვილი:

“ფინალის  შესახებ მინდა გითხრათ, რომ ეს მართლა ყველაზე დიდი სატელევიზიო მოვლენაა 2010 წელს სატელევიზიო სივრცეში. ამაზე მნიშვნელოვანი მართლა არაფერი  მომხდარა… პროექტი ხომ გამოვიდა ყველაზე  წარმატებული და წარმოიდგინეთ, ეს იქნება ამ ყველაფრის კულმინაცია! თანაც ძალიან ძლიერმა კონკურსანტებმა მოიყარეს თავი ფინალში, თითოეულ მათგანს უამრავი გულშემატკივარი ჰყავს. ძალიან საინტერესოა ვინ გახდება ხალხის რჩეული. ეს ის შემთხვევაა, როცა წინასწარი პროგნოზების გაკეთება ძალიან ძნელია – ხალხმა უნდა აირჩიოს საუკეთესო საუკეთესოთა შორის. 3 მაისს ყველაზე მნიშვნელოვანი ორშაბათია ორშაბათებს შორის!

თანაც “ნიჭიერს” ის უნიკალურობა ახასიათებს, რომ აქ მხოლოდ ფავორიტ კონკურსანტს კი არა, სასურველ ჟანრსაც ირჩევ. ჟანრების სიმრავლით კი ნამდვილად დაიკვეხნის ფინალი…

აქვე, მინდა ორიოდე სიტყვა წამყვანებზეც დავამატო – ისინი აბსოლუტურად შეესაბამებიან პროექტის სახელს და  არიან ნამდვილად ნიჭიერები, რაშიც ალბათ მაყურებელიც დარწმუნებულია…”

წამყვანები

თიკა:

კასტინგის კულისებიდან ნახევარფინალებამდე ყველაფერს კონკურსანტებთან ერთად განვიცდიდით. ახლაც, ფინალში თითოეულ კონკურსანტს ვგულშემატკივრობ და  ჩვენთვისაც ისეთივე მნიშვნელოვანი დღეა, როგორიც მათთვის. ჩემთვის ყველა ძალიან ნიჭიერია, მაგრამ გამარჯვებული მხოლოდ ერთი იქნება და   ერთი სული მაქვს მოვიდეს წუთი, როდესაც გამოვაცხადებთ ყველაზე ნიჭიერს!

ვანიკო:

მთელი პროექტის მანძილზე, როგორც თიკამ აღნიშნა, ძალიან ბევრი დადებითი ემოცია მივიღეთ. ფინალი იმდენად საინტერესო იქნება, რომ თამამად შემიძლია ვთქვა – ეს წარმატებული პროექტის წარმატებული დასასრულია!

წინ “ნიჭიერის” გრანდიოზული ფინალი გველოდება! სულ ცოტა დრო დარჩა იმისთვის, რომ ხმა მისცეთ თქვენს ფავორიტს და დაეხმაროთ მას ქვეყნის ყველაზე ნიჭიერის სტატუსის მოპოვებაში!

ხვალ, მთელი დღის მანძილზე აუცილებლად ადევნეთ თვალი ჩვენს ბლოგსაც – ყოველ ნახევარ საათში ერთხელ აქ ახალი პოსტი დაგხვდებათ, დაიდება კონკურსანტების პასუხები კითხვებზე, რომლებსაც თქვენ უსვამდით მთელი კვირის მანძილზე კომენტარებისა და იმეილის საშუალებით, ასევე შემოგთავაზებთ რეპეტიციების დროს გადაღებულ ფოტომასალას.

ბლოგი ‘Here comes the sun”

ძალიან უჩვეულოა ნიჭიერის ყურება რომ დავიწყე, რადგანაც არასდროს არ ვუყურებდი არც ჯეოსტარს, არც ვარსკვლავების აკადემიას და ამდაგვარ შოუებს.

ნიჭიერი განსხვავებული პროექტია, უფრო გემოვნებიანი და გასართობი, რადგანაც მეც კი დამაინტერესა, ასე მგონია რომ დანარჩენი შოებისგან გამოირჩება და უფრო სხვა მასებზეცაა გათვლილი, ვიდრე ჯეოსტარი და სხვები.

ჩემი აზრით ნიჭიერს თითქმის უკვე ყველა უყურებს და გულშემატკივრობს.

წაიკითხე მეტი…

ბლოგი Know-it-allz – ჭკვიანუკები

“ნიჭიერზე” აქამდე არაფერი არ მქონდა დაწერილი. ჰოდა გადავწყვიტე მოკლედ მიმოვიხილო ჩემი თვალით დანახული “ნიჭიერი”.

დავიწყებ წამყვანებით: ორივე ძალიან მომწონს და ჩემი აზრით, სახალისოდ მიყავთ გადაცემა, ასე რომ, მათზე კარგის მეტი არაფერი მეთქმის…

რაც შეეხება ჟიურის, საშინლად მაღიზიანებს “ცრემლების დედოფალი”. Jeez, რა უბედურებაა. გაბადრული სახე, გულზე დადებული ხელი, და სენტიმენტალური გამოხედვა… :@
ნიკა მემანიშვილი საჭირო კაცია ჟიურიში. რეალურად აფასებს ხოლმე კონკურსანტებს. თან ძალიან სახალისოა მისი გაკვირვებული სახეები
გეგა ფალავანდიშვილს რაც შეეხება, ჩემი აზრით, კარგია რომ მკაცრად აფასებს “ნიჭიერებს” და საკმაოდ რეალისტურადაც…

წაიკითხე მეტი…

ზურა ალხანიშვილი
სამეცნიერო-კვლევით ცენტრ RADIX-ის პრეზიდენტი

“ნიჭიერის” გუნდი მომწონს, კარგად მუშაობენ. ზოგჯერ იმდენად ემოციური სიუჟეტია, რომ აბსოლუტურ უნიჭობას მთელი არსებით ვგულშემატკივრობ. უდიდესი სიმპატიით განვეწყე თიკას და ვანიკოს მიმართ. სრულიად ახალ ამპლუაში თავი არაჩვეულებრივად წარმოადგინეს.
ერთადერთი, რაც არ მომწონს – ინტერიერია, თუმცა საერთო ჯამში, ძალიან კარგი პროექტი გამოვიდა!

ნინო ბექიშვილი
ჟურნალ ”ლიბერალის” ადამიანის უფლებათა და სამართლის განყოფილების რედაქტორი

”ნიჭიერმა” იმ გადაცემების მიხედვით, რომლებიც უკვე ვნახეთ, მგონი, ნამდვილად გაამართლა. კარგია, როცა ის, რაც დანარჩენ მსოფლიოს გამოსდის, შენც შეგიძლია. შერეკილებიც და ნიჭიერებიც ქართველებსაც ისევე გვყავს, როგორც დანარჩენ ხალხებს და ამის განცდა სასიამოვნოა, თუნდაც იმიტომ, რომ ერთნი სულ ჩვენს გამორჩეულობაზე საუბრობენ, მეორე – ნიჰილიზმში არიან გადავარდნილნი და ამბობენ, რომ არაფერი შეგვიძლია.

გამომსვლელებზე არანაკლებ სახალისო ჟიურის ყურებაა. ერთადერთი, მგონია, რომ მაია ასათიანის მაგივრად ვინმე სხვა რომ დაესვათ, აჯობებდა:)

ელზა ბადაშვილი
136-ე საჯარო სკოლის დირექტორი

როგორც სკოლის დირექტორი, “ნიჭიერს” ცოტა განსხვავებული თვალით ვუყურებ. ვცდილობ შევაფასო, თუ რა გავლენა აქვს გადაცემას ახალგაზრდა თაობაზე. ჯერჯერობით, ძალიან მომწონს ის, რასაც ვხედავ – პროექტი ჩვენი საზოგადოების სიჯანსაღეს და მრავალფეროვნებას ასახავს, ერთმანეთს ენაცვლებიან სხვადასხვა ასაკის, გამოცდილების, ეთნოსის ადამიანები, ერთ სცენაზე მღერის გამოცდილი ანსამბლი ფოლკლორულ სიმღერას და იმავე სცენაზე ცეკვავენ ბრეიქდანსს, რომელსაც ენაცვლება პატარა ნიჭიერი მომღერალი, შემდეგ ნომრად კი ახალგაზრდები, რომლებიც სასწაულ სალტოებს აკეთებენ. და ეს ყველაფერი ჩვენს საზოგადოებაში ხდებოდა თურმე, არ ჩანდა – “ნიჭიერმა” ზედაპირზე ამოატივტივა. უნიჭოებიც გვყავს, რომელთა ფონზეც კიდევ უფრო ვაფასებთ ნამდვილ ნიჭს.

ახალი თაობა თვითდამკვიდრების ახალ გზებს ეძებს და პოულობს – ყურადღების მიქცევა თურმე მარტო ქუჩაში დგომით და ჩხუბით კი არ ყოფილა შესაძლებელი, გაცილებით ეფექტურია კარგი ფოკუსების ჩატარება და გარშემომყოფთა გაოცება, ან საქართველოში უმრავლესობისთვის აქამდე უცნობი ბიტბოქსის სწავლა – იბადებიან ახალი თაობის გმირები, ჯანსაღი, საინტერესო ახალგაზრდები, რომლებიც არიან მიბაძვის ღირსნი.

სოსო გალუმაშვილი
„ჯეპრა – პიარისა და მარკეტინგული კომუნიკაციების კომპანიის“ უფროსი კონსულტანტი და დამფუძნებელი, გაუ თბილისის პიარ სკოლის პარტნიორი

“ნიჭიერზე” ბევრს ლაპარაკობენ. ბევრი აქებს, მცირედნი – აძაგებენ, მაგრამ მაინც უყურებენ და შემდეგ ორშაბათს ელიან, რომ ისევ გადართონ ტელევიზორი და ისევ “ნიჭიერს” უყურონ. თუნდაც იმიტომ, რომ შემდეგი ერთი კვირა საკუთარი სოციუმიდან გარიყულები არ აღმოჩნდნენ და საკუთარი პოზიცია ნანახ–განცდილის, “ლაიქ–დისლაიქის” ტერმინებში შეაფასონ. “ნიჭიერი” განსხვავებული პროექტია რუსთავი 2–ის ყველა პროექტისგან და სხვა ტელევიზიების ყველა პროექტისგან. თუნდაც იმიტომ, რომ მარკეტინგული კუთხით, აბსოლუტურად სხვა სიბრტყეში, სხვა განზომილებაში გადაინაცვლა – უფრო ახლოს მივიდა ხალხთან და უფრო ინტერაქტიური გახდა. ეს არის 21–ე საუკუნის პირველი პროექტი საქართველოში. მერწმუნეთ, ხვალიდან სატელევიზიო სფეროში ყველა ახალი წამოწყება სწორებას “ნიჭიერზე” აიღებს.

ნოდარ ლადარია
ილიას სახელმწიფო უნივერსიტეტის პროფესორი, პუბლიცისტი

როგორც მოსალოდნელი იყო, ქართველი ხალხი ბევრად უკეთესი აღმოჩნდა იმაზე, თუ როგორ აჩვენებენ მას. ”ნიჭიერის” ყველაზე უნიჭო მონაწილეც კი გაცილებით უფრო ბუნებრივი და ჯანსაღია მისწრაფებებსა და საკუთარი თავის გამოხატვაში, ვიდრე მაღალი ჟიურის თითოეული წევრი.

სიმონ ჯანაშია
ილიას სახელმწიფო უნივერსიტეტის პროფესორი

მომწონს პროექტი, რადგან ასეთი გადაცემა შეიძლება მნიშვნელოვანი სტიმული გახდეს მრავალი ადამიანისთვის, რომ ერთი მხრივ გამოსცადოს საკუთარი თავი და მეორე მხრივ დააჯეროს საზოგადოებას, რომ ნებისმიერს შეუძლია იყოს წარმატებული. წარმატება კი ამ გადაცემაში კარგად ჩანს რომ დამოკიდებულია არა მხოლოდ დაბადებით მინიჭებული ნიჭზე, არამედ შემოქმედებით აზროვნებასა და მრავალწლიან ძალისხმევაზე.