რუსთაველის თეატრში კასტინგები გრძელდება! მონაწილეები, რომლებიც უკვე რამდენიმე თვეა „ნიჭიერის“ სცენაზე გამოსვლას ელიან, ჟიურის და მაყურებლის წინაშე გასვლის წინ ღელავენ, ბოლოჯერ გადიან საკუთარი ნომრების რეპეტიციას.

გთავაზობთ რამდენიმე მათგანის წინასანიჭიერო განცდებს სპეციალურად  ნიჭიერის ბლოგისთვის:

ზვიადი –  №1721 (მოცეკვავე)

                                                                                                                                                                                                                                                                                                                                                                                                                                                                                                                                                                                                4 წლის წინ, პირველად ვნახე Britain’s Got Talent-ი. ბავშვობიდან ვცეკვავ და ძალიან მომეწონა. მას შემდეგ, ინტერნეტში თითქმის ყველა ანალოგი ვნახე და ყოველთვის ვოცნებობდი, რომ მსგავს სცენაზე გამოსვლის საშუალება მომცემოდა. როცა გავიგე, რომ რუსთავი2-მა საქართველოშიც ჩამოიტანა Got talent-ი, დავიწყე გამოსვლაზე ფიქრი. უფრო სწორად, მაშინვე გადავწყვიტე, მაგრამ  სანამ არ ჩავთვალე, რომ ნამდვილად მზად ვიყავი, მონაწილეობა არ მიმიღია.

ცეკვა ჩემი ჰობია და არა პროფესია, თუმცა, ბავშვობიდან მთელ ენერგიას მას ვახმარ. ახლობლებისთვის სიურპრიზი იქნება ჩემი გამოსვლა. ჯერ სახლში ვვარჯიშობდი, შემდეგ კი საღამოობით სკოლის დარბაზში.

სოფოს, გეგას და ვანოს მიმართ ძალიან კარგად ვარ განწყობილი, ვიცი, რომ ობიექტურები არიან და ველოდები როგორ ჩაივლის ჩემი ნომერი. ძალიან ვნერვიულობ, ოთხი წლის ოცნების ასრულებამდე სულ რამდენიმე საათია დარჩენილი!

 

საბა – №1780 (ბიტბოქსერი)

„ნიჭიერის” ორივე სეზონი ნანახი მაქვს, ერთი გადაცემაც კი არ გამომიტოვებია. ორი წლის წინ დავიწყე ბიტბოქსში ვარჯიში, ინტერნეტში ნანახი ვიდეოების მიხედვით. თავიდან არ გამომდიოდა კარგად, მაგრამ ყოველ წუთს ვარჯიშის შედეგად, მივაღწიე მიზანს.

ვფიქრობ, მეორე ტურში გადავალ. გამარჯვებაც ძალიან მინდა, მაგრამ იმედი არ მაქვს. ეს ჟანრი ჯერ კიდევ არც ისე პოპულარულია. ჯერ არ ვნერვიულობ და იმედი მაქვს, არ ვინერვიულებ, რადგან ეს ყოველთვის ხელს უშლის კარგად შესრულებას.

ნინო – №2901 (მომღერალი)

„ნიჭიერის“ პრეკასტინგზე ბათუმში მივედი და ბოლო მონაწილე ვიყავი იმიტომ, რომ ძალიან დიდხანს ვფიქრობდი გადამედგა, თუ არა ეს ნაბიჯი. ეს ნერვიულობის გამო იყო. თუმცა, როცა წინა სეზონებს ვუყურებდი, ყოველთვის მინდოდა იმ მონაწილეებს შორის მეც ვყოფილიყავი და საბოლოოდ გადავწყვიტე.

ახლა, სულ ცოტა ხანში ჟიურის წინაშე მომიწევს გასვლა. როგორც სოფომ, ვანომ და გეგამ თქვეს, წელს უფრო მკაცრები უნდა იყვნენ, მაგრამ ვიცი, რომ ობიექტურები იქნებიან. იმედი მაქვს არ ვინერვიულებ.

მართალია ბევრ კონკურსში მიმიღია მონაწილეობა, მაგრამ „ნიჭიერი“ ყველა მათგანისგან განსხვავებული, საპასუხისმგებლო და ყველაზე მეტად მნიშვნელოვანია – მთელი საქართველო გიყურებს!

კასტინგებს უკვე გამოცდილი მონაწილეებიც ესწრებიან. მათ წინა სეზონებზე სწორედ ასეთივე განცდები ჰქონდათ სცენაზე გასვლის წინ :) ერთ-ერთ მათგანს, მეორე სეზონის ნახევარფინალისტ ილუზიონისტს, ირაკლი სარალიძეს (გრიზლი) ვკითხეთ ახალი მონაწილეების და ახალი სეზონის მოლოდინების შესახებ აზრი:

იმის მიუხედავად, რომ მეთორმეტე კლასში ვარ და ძალიან ბევრი სამეცადინო მაქვს, უკვე მესამედ ვესწრები კასტინგს. რამდენიმე ჩემი კოლეგაც ვნახე და მომეწონა რამდენიმე მათგანის ნომერი. ასევე, უნდა ვთქვა, რომ ძალიან ბევრი განსხვავებული მონაწილე, განსხვავებული ჟანრია. ზოგი კი განსაკუთრებით – არც ერთ ანალოგში არ მინახავს მსგავსი რამ. რაც შეეხება ჟიურის, წელს უფრო გამოცდილები არიან. კარგი გადაწყვეტილებაა, რომ არ შეიცვალა შემადგენლობა. ნიჭიერის ბლოგის მკითხველებს უკვე შემიძლია ვუთხრა – ძალიან საინტერესო სეზონი გველის, ამ სიტყვის ყველაზე მძაფრი გაგებით.

კასტინგების დასრულებამდე დარჩა 2 დღე! 

ჟიურის წევრები წინა სეზონის გამოცდილებით უკვე მომზადებულები დახვდნენ პირველივე კონკურსანტს : ) კულისებში, კასტინგის დაწყებამდე რამდენიმე წუთით ადრე, ერთად ემზადებიან მაყურებელთან და კონკურსანტებთან შესახვედრად, უზიარებენ ერთმანეთს მოლოდინებს. დასრულების შემდეგ კი  -  შთაბეჭდილებებს.

 

სამივეს მეტი მოლოდინი აქვს სცენაზე გამომსვლელებისგან, რადგან მათ უკვე ბევრი შთამბეჭდავი ნომერი ნახეს ნიჭიერის სცენაზე. შესაბამისად, მაყურებელიც წინა სეზონის შემდეგ კიდევ უფრო  გაუმჯობესებას, მეტ სანახაობას ელოდება…

სცენაზე გასვლის წინ, კონკურსანტებს თიკა და ვანიკო ამხნევებენ და როგორც ამბობენ, მათთან ერთად განიცდიან მღელვარებას :) ტრადიციულად ეხმარებიან მონაწილეებს  და ხშირად მათი ნომრის თანამონაწილეებიც ხდებიან!

კასტინგები გრძელდება. მომდევნო ორ დღეს, 8 და 9 თებერვალს კიდევ ბევრ კონკურსანტს იხილავს რუსთაველის თეატრში შეკრებილი მაყურებელი.

იხილეთ “კურიერის” და “დილა მშვიდობისა საქართველოს” სიუჟეტები პირველ ორ დღესთან დაკავშირებით:

ქართული სატელევიზიო სივრცის ისტორიაში ყველაზე რეიტინგული შოუ მესამე სეზონისთვის ყველაზე ნიჭიერების შერჩევას იწყებს! მთელი ზაფხულის მანძილზე, პროექტის პროდიუსერებმა საქართველოს სხვადასხვა ქალაქებსა და სოფლებში ათასობით კონკურსანტიდან 500-მდე გამორჩეული მონაწილე შეარჩიეს და ისინი ახლა უკვე ჟიურის და მაყურებლის წინაშე წარსდგებიან.

პროექტის ხელმძღვანელების გადაწყვეტილებით, ჟიურის შემადგენლობა უცვლელია – კონკურსანტებს გეგა ფალავანდიშვილი, სოფო ნიჟარაძე და ვანო ჯავახიშვილი შეაფასებენ.  გეგა უკვე მესამე სეზონია, რაც ჟიურის შემადგენლობაშია. ვანო და სოფო 2011 წელს შემოუერთდნენ ნიჭიერს და ახლა უკვე საკმაოდ დიდი გამოცდილებით შეხვდებიან ახალ მონაწილეებს. როგორც ვანო ამბობს, ის წელს უფრო მეტ პასუხისმგებლობას გრძნობს და ეცდება მეტად ობიექტური იყოს, რასაც შეიძლება სიმკაცრეც კი მოჰყვეს.

ახალ სეზონზე, იქნება კიდევ ერთი სიახლე – ერთნაირი ჟანრის ნომრებისთვის, ჩატარდება მეორე ტური იმისთვის, რომ მაყურებელმაც მიიღოს მონაწილეობა საბოლოო ორმოცდაათეულის შერჩევაში. ამის შედეგად, დაძაბულობა შეემატება პროექტს და კონკურსანტებსაც მეტი კონკურენციის პირობებში მოუწევთ ნახევარფინალის საგზურის მოპოვება.

მიუხედავად იმისა, რომ უკვე მესამე სეზონია “ნიჭიერი” ყველაზე გამორჩეული ნიჭებით დაჯილდოებულ ადამიანებს (და არა მარტო) ეძებს, როგორც გეგა ფალავანდიშვილმა “სხვა ამბები”-ს ეთერში თქვა, რესურსი ჯერ არ არის ამოწურული. წელს კონკურსანტების რაოდენობა კიდევ უფრო მეტია და კიდევ უფრო მრავალფეროვანი. მათ უკვე იციან რა მოსწონს მაყურებელს და როგორ სანახაობას ელოდება ჟიური.

2012 წლის სეზონის 6 გადაცემის ჩაწერა 7-8 დღის მანძილზე გაგრძელდება. განრიგის შესახებ დეტალებს რუსთავი2-ის ეთერში და ჩვენი ბლოგის საშუალებით შეგატყობინებთ. შესარჩევ ტურებს რუსთაველის თეატრი უმასპინძლებს. კასტინგების თარიღებია 4 და 5 თებერვალი, 12:00 და 16:00 საათი. დანარჩენი დღეების შესახებ ინფორმაციისთვის, გვადევნეთ თვალი!